धनुषामा सशस्त्र प्रहरी र तस्कर समूहबीच झडप भएको छ। झडपमा चार राउन्ड हवाई फायर पनि भएको छ।
भारतबाट अवैध रूपमा ल्याएको सामान नियन्त्रणमा लिने क्रममा बुधबार राति सवा ८ बजे विदेह नगरपालिका–२ दुहवीस्थित आँप बगैंचामा झडप भएको सशस्त्र प्रहरी बलका सहप्रवक्ता तथा डिएसपी शैलेन्द्र थापाले जानकारी दिए।
सशस्त्रको प्रस्तावित सीमा सुरक्षा गुल्म महिनाथपुबाट डिएसपीको कमान्डमा रहेको सुरक्षा फौजले सामान नियन्त्रणमा लिन खोज्दा तस्कर र स्थानीय बासिन्दा जम्मा भई सुरक्षाकर्मी माथि ढुंगामुढा प्रहार गरेका थिए।
स्थिति नियन्त्रणमा लिन सशस्त्र प्रहरीले एसएलआरबाट चार राउन्ड हवाई फायर गरेको डिएसपी थापाले बताए।
स्थानीयले तस्करीका केही सामान लुकाएका छन् भने एउटा मोटरसाइकल र केही किराना सामान नियन्त्रणमा लिइएको छ। बरामद सामान तथा मोटरसाइकल आवश्यक कार्यबाहीका लागि सम्बन्धित निकायमा बुझाउने प्रक्रियामा रहेको उनले बताए।
-1746009348.jpg)
