दाङमा बच्चाको हत्या कसुरमा १० वर्ष कैद तोकिएकी एक महिला २३ वर्षपछि पक्राउ परेकी छन्।
दाङ गढवा गाउँपालिका–०७ मानपुरका ९ वर्षीय शरद शर्माको हत्या आरोपी ५० वर्षीया वशन्ता शर्मा पण्डित काठमाडौंबाट पक्राउ परेकी हुन्।
शरदकी आमा गीता ज्ञवाली शर्मा पण्डितको उनलाई जन्म दिनासाथ मृत्यु भएको थियो। त्यसपछि गंगाप्रसाद शर्माले वशन्ता शर्मा पण्डितलाई दोस्रो श्रीमतीको रूपमा भित्र्याएका थिए। वशन्ताले शरदलाई घरभित्रै खाना माग्दा लाठी प्रहार गरी निर्मम तरिकाले हत्या गरेकी थिइन्।
यो घटना २०५९ असार १९ गतेको हो।
त्यतिबेला वशन्ताले शरदको हत्यापछि आफै वडा प्रहरी कार्यालय लमहीमा पुगेर छोरा हराएको भन्दै निवेदन दिएकी थिइन्।
तर वशन्ताको शंकास्पद व्यवहार देखेपछि प्रहरी घरमै पुगेको थियो।
घटनाको दोस्रो दिन स्थानीय र प्रहरीले खोज तलास गर्ने क्रममा घर नजिकैको मल खाल्डोमा खनिएको देखिएको थियो। त्यो ठाउँमा खोतलेर हेर्दा गाडेको अवस्थामा ९ वर्षीय बालक शरदको शव फेला परेको थियो। शरदको शव फेला परेपछि तत्कालै वशन्तालाई प्रहरीले पक्राउ गरेको थियो।
कर्तव्य ज्यानसम्बन्धी मुद्दा चलाउनु पर्ने मिसिल प्रहरीले सरकारी वकिलको कार्यालयमा बुझाएपछि जिल्ला अदालतले पूर्पक्षका लागि वशन्तालाई थुनामा पठाइएको थियो।
उक्त कर्तव्य ज्यान मुद्दामा दाङ जिल्ला अदालतले २०६० असोज २६ गते हत्या आरोपी वशन्तालाई दुई वर्ष कदै सजायको फैसला सुनाएको थियो।
तर, जिल्लाको फैसला चिज्ञ नबुझेको भन्दै आफन्त पुनरावेदनका लागि तत्कालीन पुनरावेदन अदालत तुलसीपुर पुगेका थिए। तत्कालीन पुनरावेदन अदालत तुलसीपुरमा उक्त कर्तव्य ज्यान मुद्दा विचाराधीन नै थियो। त्यो बीचमा झन्डै एक वर्ष बढी कैद सजाय भुक्तान गरी वशन्ता जेलबाट छुटिसकेकी थिइन्। तत्कालीन पुनरावेदन अदालत तुलसीपुरले वशन्ता शर्मा पण्डितलाई २०६० माघ ३ गते १० वर्ष कैद सजाएको फैसला सुनाएको थियो। त्यसयता वशन्ता फरार सूचीमा थिइन्।
दाङका प्रहरी प्रमुख एसपी अर्जुनप्रसाद तिमिल्सिनाले २३ वर्ष पहिलेको घटनामा लुकिछिपी बस्दै आएकी बशन्ता काठमाडौंबाट पक्राउ परेको बताए।
वशन्तालाई साउन २० गते काठमाडौं महानगरपालिका–९ गोंगबुमा आफ्नो छोरा केशवराज शर्मासँग लुकिछिपी बस्दै आएको अवस्थामा पक्राउ गरिएको एसपी तिमिल्सिानाले बताए।
जिल्ला प्रहरी कार्यालय दाङ, इलाका प्रहरी कार्यालय गढवा दाङबाट खटिएको प्रहरी टोलीले काठमाडौं प्रहरीसँग समन्वयमा वशन्तालाई साउन २० गते पक्राउ गरिएको बताएको छ।
प्रहरी स्रोतका अनुसार बशन्ता पछिल्लो समय सामाजिक सञ्जालमा सक्रिय थिइन्। उनले टिकटकमा आफ्ना नयाँ भिडिओहरू बनाउँदै पोष्ट गर्दै आएकी थिइन्। तिनै भिडिओहरूको विश्लेषण गर्दै प्रहरीले उनको खोजी थालेको थियो।
वशन्तालाई दाङ ल्याएर प्रहरीले पत्रकार सम्मेलन गरी बुधबार सार्वजनिक गरेको हो।
जिल्ला प्रहरी प्रवक्ता डिएसपी चक्रबहादुर शाहका अनुसार वशन्तालाई जिल्ला अदालतमा पेस गरिएकोमा अदालतको आदेशले तोकिएको सजाय भुक्तान गर्नका लागि बुधबार नै कारागार चलान गरिएको छ।
-1746009348.jpg)
