तारकेश्वर नगरपालिका वडा नम्बर ११ का वडाध्यक्ष कविराज बस्नेत प्रहरी कार्यालयमा हाजिर भएका छन्।
काठमाडौं र तारकेश्वर नगरपालिकाबीचको सीमा विवादमा झडप हुँदा घाइते भएका व्यक्तिले वडाध्यक्ष बस्नेतविरूद्ध जाहेरी दिएका थिए।
जिल्ला अदालत काठमाडौंबाट पक्राउ पुर्जी जारी भएको थाहा पाएपछि वडाध्यक्ष बस्नेत मंगलबार जिल्ला प्रहरी परिसर काठमाडौंमा हाजिर भएको एसपी कुलदिप चन्दले जानकारी दिए।
‘उहाँ निवेदनसहित हाजिर हुन आउनुभएको छ। उहाँको बयान लगायत अनुसन्धानका काम कारबाही भइरहेको छ,’ उनले भने।
उनीविरूद्ध ज्यानमार्ने उद्योग कसुरमा पक्राउ पुर्जी जारी भएको हो।
तारकेश्वर-११ र काठमाडौं-१६को सीमाना पर्ने महादेव खोला किनारमा बाँध निर्माण गर्ने विषयमा दुई पक्षका स्थानीयबीच झडप भएको थियो।
उनी कांग्रेसबाट निर्वाचित वडाध्यक्ष हुन्।
उक्त सीमा क्षेत्रमा काठमाडौं उपत्यका विकास प्राधिकरणले बाँध निर्माणका लागि ठेक्का लगाएको थियो। तर ठेक्का लगाइसकेपछि प्राधिकरणले खोला रेखांकन गरेको दुवैका स्थानीयहरूले चित्त बुझाएका थिएनन्।
कानुनअनुसार डिमार्केशन गर्ने आधिकारिक निकाय भनेको प्राधिकरण नै हो। प्राधिकरणको निर्णय चित्त नबुझे स्थानीयहरू अदालत जान सक्छन्। तर तार्केश्वर र काठमाडौंका स्थानीयहरूले सीमा एकअर्कापट्टी देखाउँदै काममा बाधा पुर्याउँदै आएका थिए। त्यसक्रममा पटकपटक झडप पनि भएको थियो।
-ink-1720175476.jpeg)
-1746009348.jpg)
