काठमाडौंको ठमेलमा सानुभाइ भनिने युवराज गुरूङको समूहसँग झगडा गरेको आरोपमा प्रहरीले ओम्निया क्लबका सञ्चालकलाई पक्राउ गरेको छ।
प्रहरीले शनिबार म्हेपी क्षेत्रबाट सञ्चालक राजेन्द्र गुरूङलाई पक्राउ गरेको हो।
जिल्ला प्रहरी परिसर काठमाडौंका एसएसपी विश्व अधिकारीले सानुभाइको समूहसँग झगडामा संलग्न भएको आरोपमा पक्राउ गरिएको बताए।
‘सानुभाइको टोलीसँग झगडा गरेको घटनामा उनी पक्राउ परेका हुन्,’ उनले भने।
प्रहरी वृत्त सोह्रखुट्टेले उनलाई हिरासतमा राखेर अनुसन्धान गरिरहेको छ।
साउन १४ गते मध्यराति ठमेलको नगरकोट दोहोरी साँझमा झडप भएको थियो। दुई पक्षबीच झडप भएको खबरपछि प्रहरीको टोलीले तीन जनालाई नियन्त्रणमा लिएको थियो।
जसमध्ये एक जना सानुभाइ भनिने युवराज गुरूङ हुन्। जो पटकपटक गुण्डागर्दी गरेको आरोपमा पक्राउ परिसकेका व्यक्ति हुन्।
यस्तै अर्को पक्षबाट रविन्द्र गुरूङ र दिलकुमार गुरूङ पक्राउ परे। यो समूहबाट प्रहरीले सञ्चालक राजेन्द्र गुरूङलाई पक्राउ गरेको हो।
प्रहरी पुग्दा सानुभाइ पक्षका अरू भने भागेका थिए।
प्रहरी स्रोतका अनुसार उनीहरूबीच पुरानो रिसइबी देखिएको हो।
२०८० असार १५ मा क्लबमा सानुभाइले सञ्चालक गुरूङमाथि कुटपिट गरेका थिए। त्यसपछि प्रहरीले सानुभाइलाई पक्राउ गरेको थियो।
तर पछि उनी धरौटीमा छुटेका थिए।
यही विषयमा झडप भएको खुलेसँगै प्रहरीले सञ्चालक गुरूङलाई पनि पक्राउ गरी अनुसन्धान अघि बढाएको हो।
1629564113.JPG)
-1746009348.jpg)
