केही दिनयता सामाजिक सञ्जाल फेसबुक र टिकटकमा चक्रे मिलन भनिने मिलन गुरूङ देखिएका भिडिओ आइरहेका थिए।
काठमाडौंको महाराजगन्ज आसपासकै सडक छेउमा भिड जम्मा गरेर चक्रेले केक काट्दै गरेका भिडिओ पनि 'भाइरल' छ।
सामाजिक सञ्जालमा त्यस्ता भिडिओहरू धेरै आउन थालेपछि प्रहरी निगरानी थालेको थियो।
दुई/तीन दिनयता चक्रे आफ्नो जन्मदिन मनाउँदै थिए। जन्मदिनका अवसरमा पशुपति पुगेर पैसा बाँडेको भिडिओ चक्रे आफैले पनि टिकटकबाट सार्वजनिक गरेका छन्।
जन्मदिन मनाउन चक्रेलाई उनका समूहका सदस्यहरूले 'स्कर्टिङ' गरेको भिडिओ पनि आएको थियो। त्यो भिडिओमा भक्तपुरको सडकमा तीन वटा गाडी लस्करै चलाएर अरू गाडीलाई अगाडि जान नदिइएको दृश्य थियो।
त्यस्ता भिडिओहरू काठमाडौं उपत्यका अपराध अनुसन्धान कार्यालयका प्रहरी अधिकारीहरूले हेरेका थिए।
उनीहरूले त्यो भिडिओ कार्यालयका प्रमुख एसएसपी रमेश बस्नेतलाई देखाए। भिडिओ हेरेपछि एसएसपी बस्नेतले ती मानिसहरूलाई निगरानी गर्न निर्देशन दिएका थिए।
बिहीबार नै काठमाडौं उपत्यका प्रहरी कार्यालय रानीपोखरीका प्रमुख एआइजी टेक तामाङले काठमाडौं प्रहरी परिसर र अपराध अनुसन्धान कार्यालयका प्रमुखलाई बोलाए।
कार्यालयका प्रमुख एसएसपी बस्नेत र परिसरका एसएसपी विश्व अधिकारीलाई चक्रे मिलनकै गतिविधिका भिडिओ देखाए र निर्देशन दिए- सामाजिक सञ्जालमा आतंकित बनाउनेहरू देखिन थाले, निगरानी गर्नूस्।
निर्देशनसँगै चक्रे मिलन र उसको समूहले के-कस्ता गतिविधि गरिरहेका छन् भनेर दुवै निकायले अनुसन्धान सुरू गर्यो।
बिहीबार नै चक्रे मिलनको खोजी थाल्यो।
विभिन्न सूचना संकलन गर्दै कार्यालयले चक्रे मिलनको टोली महाराजगन्जस्थित साम्बाला होटलमा रहेको सूचना पायो।
अबेर राति प्राप्त भएको सूचनाको आधारमा प्रहरी निरीक्षक सुरज खत्रीसहित २२ जनाको टोली साम्बाला होटलमा बेलुकी ११:३० बजेतिर पुगेको थियो।
साम्बाला होटल बाहिरैसम्म पनि हो-हल्ला सुनिएको फिल्डमा खटिएका प्रहरीले बताए।
‘त्यहाँ पुगेर सुरूमा मान्छे छन् कि छैनन् भनेर भेरिफाइ गर्नुपर्ने थियो। टोलीकै केही सदस्यलाई होटलभित्र हेर्न पठाइयो,’ ती प्रहरीले भने।
हेर्न गएका प्रहरीले एउटा समूह रूफ-टपमा रहेका हल र कोठामा बसिरहेको जानकारी गराए।
राति ११: ४० बजे होटलमा चक्रे मिलनकै टोली रहेको पुष्टि भयो। त्यसबारे उनीहरूले एसएसपी बस्नेतलाई जानकारी गराए।
कार्यालयको टोली प्राय: सिभिल ड्रेसमा हुन्छन्। त्यसकारण टोली आफैले छापा मारेन।
एसएसपी बस्नेतले परिसरका एसएसपी अधिकारीसँग समन्वय गरे। प्रहरी वृत्त महाराजगन्जबाट डिएसपी निरन्जन थापा नेतृत्वको प्रहरी त्यहाँ पुग्यो। युनिफर्ममा रहेका प्रहरी २०-२५ जना थिए।
‘सिभिलमा जाँदा मुठभेड हुन सक्छ। परिसरको टोलीको सपोर्टको लागि समन्वय भयो,’ ती प्रहरीले भने, ‘केही बेरमा डिएसपी सहितको टोली आएपछि अपरेसन भएको हो।’
ती प्रहरीका अनुसार प्रहरी त्यहाँ पुग्दा चक्रेसहितको समूह आफ्नै सुरमा बर्थडे मनाइरहेका थिए। प्रहरीलाई देखेर उनीहरू पनि एकछिन ‘चकित’ परे।
त्यहाँ बसिरहेकामध्ये एक जनाले आएर प्रहरीसँग सोधेका थिए, ‘केही थियो सर?’
प्रहरीले उनीहरूको गतिविधिबारे जानकारी गराए र सबैलाई एकै ठाउँमा भेला हुन भने।
प्रहरी पुगेर जन्मदिनको मनाउने कार्यक्रम बिथोलेको भनेर समूहका कतिपयले आपत्ति जनाएका थिए।
‘वर्षमा एकचोटी आउने बर्थडे पनि मनाउन नपाउने हो र,’ समूहमा रहेका एक युवाले प्रहरीलाई प्रश्न गरे। चक्रे मिलन पनि त्यहीँ थिए। उनी केही नबोलेका ती प्रहरीले बताए।
सोधपुछ गर्दा चक्रेको वास्तविक बर्थडे बिहीबार नै रहेको बताएका थिए। तर केही दिनदेखि मनाइरहेको भनेर समूहका एक जनाले प्रहरीलाई जानकारी दिए।
राति सर्च अपरेसनकै क्रममा प्रहरीले त्यो समूह चढ्ने गाडीमा पनि तलासी लिएको थियो। 'एउटा गाडीबाट खुकुरी, रड र पेपर स्प्रे समेत बरामद भएको छ,' अपरेसनमा खटिएका एक प्रहरीले भने।
कार्यालयका एसपी काजीकुमार आचार्यका अनुसार ४७ जनालाई नियन्त्रणमा लिइएको र सबैलाई परिसरमा राखेर स्क्रिनिङ गरिरहेको छ।
‘उनीहरूले सामाजिक सञ्जालमा गुण्डागर्दी शैलीमा सर्वसाधरणलाई आतंकित बनाउने, शोअफ गर्ने खालका गतिविधिहरू गरिरहेका थिए,’ उनले भने, ‘तीन चार दिन पहिले बाटो कब्जा गरेर गाडी चलाउने खालका गतिविधि देखिएको थियो। बर्थडे मनाउने बहानामा पनि हो-हल्ला गर्ने गरेपछि प्रहरी परिचालन गरी नियन्त्रणमा लिइएको हो।’
अहिले आपराधिक पृष्ठभूमि हेरिने पनि उनले बताए। उनीहरूमाथि मुद्दा चलाउने नचलाउने, चलाए कुन शीर्षकमा चलाउने भनेर काठमाडौंका दुई प्रमुखहरूबीच छलफल समेत गर्ने तयारी छ।
रातभरि गरिएको अपरेशनले नियन्त्रणमा लिइएका व्यक्तिहरू सबैको विवरण लिने काम भइरहेको प्रहरीले बताएको छ।
-1746009348.jpg)
