इसराइलले सिरियाको राजधानीमा हवाई हमला गरेको छ।
बुधबार सिरियाको राजधानीको केन्द्रमा इसराइलले शक्तिशाली हवाइ आक्रमण गरेको हो।
आक्रमणमा परी तीन जनाको मृत्यु भएको छ भने ३४ जना घाइते भएको अमेरिकी मिडिया सिएनएनले जनाएको छ।
इसराइलले सिरियाको सैन्य मुख्यालय र रक्षा मन्त्रालयको भवनमा बम खसालेको भनेर विभिन्न अन्तर्राष्ट्रिय सञ्चारमाध्यमहरूले उल्लेख गरेका छन्।
सिरियाको टेलिभिजनले रक्षा मन्त्रालयको भवनमा शक्तिशाली विस्फोट भएको लाइभ देखाइएको थियो।
समाचार पढ्दै गर्दा केही पर रहेको भवनमा अचानक बम विस्फोट भएपछि टेलिभिजन प्रस्तोता पनि अताल्लिएर समाचार कक्षबाट बाहिरिएको भिडिओ सार्वजनिक भएको छ।
अमेरिकी मिडिया सिएनएनका अनुसार अमेरिकी राष्ट्रपति डोनाल्ड ट्रम्पको इच्छविपरीत इसराइलले सिरियामा आक्रमण गरेको थियो।
सिरियामा आक्रमण गर्दा क्षेत्रीय तनाव बढ्ने भएकाले अमेरिकाले इसराइललाई सिरियामा हमला नगर्न भनेको थियो। यद्यपि इसराइलले सिरियामा शक्तिशाली हमला गरेको हो।
इसराइलले सिरियामा हमला गर्नुको कारणमा सिरियाको अल्पसंख्यक ड्रुज समुदायमाथि त्यहाँको सरकारी सेनाले दमन गरेकाले भनेको छ। सिरियामा करिब ७ लाख ड्रुज समुदायका मानिसहरू रहेको अन्तर्राष्ट्रिय सञ्चारमाध्यमहरूले जनाएका छन्।
दक्षिणी सहर सुवेइदामा उक्त समुदायको बाहुल्यता छ। त्यहाँ आइतबारदेखि सरकारी सेना र ड्रुज मिलिसियाबीच द्वन्द्व चर्किएको छ। मंगलबारदेखि झडपले तीव्र रूप लिएको थियो। सिएनएनका अनुसार झडपमा ३० जनाको मृत्य भएको थियो भने अन्य दर्जनौं घाइते भएका छन्।
इसराइलको गोलन हाइट्समा पनि ड्रुज अल्पसंख्यकहरू बस्छन्। त्यहाँ झन्डै १ लाख ३० हजार ड्रुज समुदायका मानिसहरूको बोसबास रहेको सिएनएनले जनाएको छ। इसराइलको सेनामा पनि ड्रुज समुदायका मानिसहरूले सेवा गरिरहेका छन्।
इसराइली सरकारले उनीहरूलाई इसराइली नागरिकता दिन खोजे पनि ड्रुजहरूले आफू सिरियाली पहिचानमै अडिग रहने घोषणा गरेका थिए।
सिरियामा सरकारी सेनासँग द्वन्द्व चर्किएपछि इसराइलबाट पनि ड्रुज समुदायका मानिसहरू सुवेइदा पुगेका थिए।
त्यसकारण इसराइलले भातृत्वको नाताले ड्रुज समुदायको रक्षा गर्नु आफ्नो जिम्मेवारी रहेको दाबी गर्दै सिरियामा हमला गरेको सिएनएनले जनाएको छ।
इसराइलले सुवेइदाबाट तत्काल सरकारी सेनालाई हट्न चेतावनी दिएको थियो। त्यसो नगरे अझै शक्तिशाली आक्रमण गर्ने धम्की दिएको थियो।
धम्कीपछि सिरियाले सुवेइदाबाट सरकारी सेना फिर्ता गरिसेको छ।
सिरियासहित कतार र इराकले पनि इसराइली हमलाको निन्दा गरेका छन्।
सिरियाले इसराइलको आक्रमणलाई सार्वभौम अधिकारमाथिको निर्लज्ज प्रहार भनेको छ। उसले सिरियामा तनाव बढाउने, अराजकता सिर्जना गर्ने र सुरक्षालाई कमजोर पार्ने प्रयास भनेको छ।
'हामी आफ्नो भूमि र जनतालाई जोगाउन अन्तर्राष्ट्रिय कानुनले दिएको सबै अधिकार प्रयोग गर्ने पूर्ण वैधानिक अधिकार राख्छौं,' सिरियाको विदेश मन्त्रालयले जारी गरेको विज्ञप्तीमा भनिएको छ।
अमेरिकी विदेशमन्त्री मार्को रुबिओले ट्रम्प प्रशासनले सिरियाको द्वन्द्व अन्त्य गर्न सबै पक्षहरूसँग संवाद गरिरहेको बताएका थिए।
'हामीले यस्तो विशेष योजना बनाएका छौँ जसले आज रातिभित्रै यो भयावह र चिन्ताजनक स्थितिको अन्त्य हुनेछ। यसका लागि सबै पक्षले गरेका प्रतिबद्धता पूरा गर्नुपर्छ, र हामी त्यही अपेक्षा गर्छौं,' रूविओले बुधबार एक्समा लेखेका थिए।
उनले इसराइल र सिरियाबीचको पछिल्लो तनावलाई एकअर्कामाथिको गलत बुझाइ भनेका छन्। उनले त्यसबारे ओभल अफिसमा छलफल भएको पनि बताएका थिए।
-copy-1745411477.jpg)
-1746009348.jpg)
