मोटरसाइकल मर्मतपछि राजमार्गमा टेस्ट ड्राइभका लागि निस्किएका मिस्त्री गाडीको ठक्करबाट गम्भीर घाइते भएका छन्।
उरहरी चोकको आचार्य मोटरसाइकल वर्कसप ग्यारेजमा मिस्त्रीको रूपमा काम गर्ने तुलसीपुर उपमहानगरपालिका – १३ फूलबारीका २० वर्षीय दिपेश नेपाली स्कार्पियोको ठक्करबाट गम्भीर घाइते भएका छन्।
रा ७ प ५५५९ को मोटरसाइकल मर्मतपछि साढे १० बजेतिर राजमार्गमा टेस्ट ड्राइभका लागि निस्किएका नेपालीलाई शुक्रबार बिहान साढे १० बजेतिर तुलसीपुर–११ उरहरी चोकमा बा १८ च ३१३९ नम्बरको स्कार्पियोले ठक्कर दिएको थियो।
स्कार्पियो तुलसीपुरबाट अमेलिया दक्षिणतर्फ जाँदै थियो भने मोटरसाइकल विपरीत दिशाबाट आउँदै थियो।
घाइते नेपालीको बाँया खुट्टा, ढाड र पेटमा गम्भीर चोट लागेको छ।
अचेत अवस्थाका नेपालीलाई राप्ती प्रादेशिक अस्पताल तुलसीपुरको प्रारम्भिक उपचारपछि थप उपचारका लागि बिहान ११ बजेतिर नर्सिङ होम नेपालगञ्जका लागि रिफर गरिएको इलाका प्रहरी कार्यालय तुलसीपुरका प्रहरी प्रवक्ता प्रहरी निरीक्षक सूर्य राना मगरले बताए।
दुर्घटनालगत्तै प्रहरी चौकी उरहरीबाट प्रहरी नायब निरीक्षक यकबहादुर खड्काको कमाण्डमा ४ जनाको टोलीले स्कार्पियो चालक सल्यानको कपुरकोट गाउँपालिका–३ का वर्ष ३१ वर्षीय रेवन्तसिङ ठकुरीलाई नियन्त्रणमा लिएको थियो।
दुर्घटनाबारे थप अनुसन्धान हुने प्रहरीले जानकारी दिएको छ।
-1746009348.jpg)
