ललितपुरको सानेपास्थित राजतीर्थ किराना पसलमा सोमबार एक हुल मान्छे छिरे। पसलमा रूपेशकुमार गुप्ता र उनका सहयोगी विपिन कुमार बसिरहेका थिए।
नीलो सुट-पाइन्ट लगाएका एक हुल मान्छे एक साथ आफ्नो पसलमा छिरेपछि रूपेश र विपीन अक्क न बक्क भए।
उनीहरूले के भइरहेको छ भन्ने भेउ नपाउँदै ती मानिसहरूले किराना पसलको खानतलासी गर्न थाले। रूपेश र विपिनले बल्ल थाहा पाए- उनीहरू नेपाल प्रहरीको केन्द्रीय अनुसन्धान ब्युरो (सिआइबी)बाट खटिएका टोली थिए।
सिआइबीको टोलीले गुप्तासँग रहेको पाँच वटा मोबाइल बरामद गर्यो।
त्यहीँ पसलमा रहेको आठ लाख २० हजार नेपाली रुपैयाँ र भारतीय १० हजार रुपैयाँ पनि बरामद गर्यो। त्यस्तै त्यहाँ रहेको सिसिटभी डिभिआर पनि बरामद गरेको छ। त्यसपछि दुबै जनालाई पक्राउ गरी अनुसन्धान प्रक्रिया अघि बढाएको छ।
प्रहरी त्यहाँ एउटा सूचनाको आधारमा पुगेको हो।
‘हामीलाई क्रिप्टोकरेन्सी र हुण्डी कारोबारी त्यहाँ छन् भनेर सूचना आएको हो,’ सिआइबीका एसएसपी होबिन्द्र बोगटीले भने।
रूपेश र विपिनकुमार दुवै भारतीय नागरिक हुन्। गुप्ता किराना पसल चलाउँथे, सँगसँगै क्रिप्टो र हुण्डीको कारोबार समेत गर्ने गरेको प्रहरीको भनाइ छ।
उनीहरू पसल रहेकै घरको माथिल्लो तलामा बस्थे। त्यहाँबाट त संरक्षित वन्यजन्तु कस्तुरीको विना पनि फेला परेको छ।
बरामद गरिएको मोबाइल हेर्दा उनको क्रिप्टो करेन्सीको कारोबार रहेको खुल्यो।
सिआइबीका अनुसार उनको एक अर्ब ५० करोड भन्दा बढी रकमको कारोबार गरेको देखिएको छ। उनीहरूले हुण्डी पनि क्रिप्टोमार्फत गर्न थालेको देखिन्छ।
अहिले पाँचै वटा मोबाइल नेपाल प्रहरीको फरेन्सिक ल्याबमा पठाएको छ।
‘अहिले ल्याबमा पठाइएको छ। त्यहाँबाट रिपोर्ट आएपछि थप कुराहरू खुल्छ,’ एसएसपी बोगटीले भने।
सिआइबीले उनीहरूमाथि हाल अभौतिक मुद्राको प्रयोग गर्न नहुने, हुण्डीसम्बन्धी कारोबार गर्न नहुने र वन्यजन्तु सम्बन्धी कसुरमा अनुसन्धान अघि बढाएको छ।
प्रहरीका अनुसार गुप्ता भारतको बिहार मोतिहारीका हुन्। उनी १५ वर्षअघि नै नेपाल आएका थिए।
किराना पसलमा उनले विपिनकुमारलाई सहयोगीको रूपमा राखेका थिए।
उनीहरूले हुण्डी समेतको कारोबार गर्ने भएकाले रकम बुझाउनका लागि कुमारलाई पठाउने गर्थे।
‘हुण्डीको रकम डेलिभरी गर्नलाई कुमारलाई पठाउने गरेको हो। अहिले उनीहरूसँग कस्तुरीको विना पनि फेला परेको हुँदा वन्यजन्तुको पनि कारोबार गर्थे कि भनेर अनुसन्धान भइरहेको छ,’ एसएसपी बोगटीले भने।
पक्राउ परेका गुप्ताले कहिलेदेखि क्रिप्टोको कारोबार गरेको पनि यकिन खुलिसकेको छैन। तर उनले दुई वर्षदेखि कारोबार गरेको हुनसक्ने प्रहरीको भनाइ छ।
उनले भने ६ महिनादेखि कारोबार गरेको बताउने गरेका छन्।
प्रहरीले उनीहरूको बैंक डिटेल्स पनि मगाएको छ। यस्तै मोबाइलमा चिनियाँ नागरिकसँग कुराकानी गरेको च्याट पनि देखिएको छ।
त्यसकारण पनि उनले चिनियाँसँगको सहयोगमा क्रिप्टोको कारोबार गरिरहेको हुनसक्ने आशंका छ।
-1746009348.jpg)
