रसुवाको बाढीमा परी तीन जना प्रहरीसहित १८ जना बेपत्ता छन्।
उनीहरूको खोजी गर्न नेपाली सेना, सशस्त्र प्रहरी बल र नेपाल प्रहरीको टोली खटिएको छ। तर अहिलेसम्म उनीहरूको अवस्थाबारे पत्तो लागेको छैन।
गोसाइकुण्ड गाउँपालिका-२ स्थित रसुवागढीमा आएको बाढीले चीनसँग जोडिने मितेरी पुल बगाएको छ। निर्माणाधीन भन्सार यार्डमा पनि बाढी पसेको छ।
चीनको तिब्बत क्षेत्रमा परेको वर्षाका कारण त्यहाँको लेन्डे खोलामा पानीको बहाव बढेको थियो।
त्यहाँबाट आएको बाढीले नेपालको मितेरी पुल बगाएको हो।
गोसाइकुण्डका अध्यक्ष कैसाङ नुर्पु तामाङका अनुसार ३ बजेतिर बाढी आएको थियो।
‘३ बजेतिर बाढी आएको भनेर अलर्ट आएको थियो। त्यसरी बाढी आएको थाहा पायौं। पछि अरूसँग पनि कुराकानी भयो,’ उनले भने।
उनका अनुसार बाढी आएपछि बगाएका धेरैजसो भन्सारको ड्राइपोर्टमा रहेकाहरू हुन्।
भन्सार यार्डमा गाडी निकाल्न गएकाहरू पनि परेको हुनसक्ने उनले बताए।
‘कहाँकहाँबाट बेपत्ता भए भन्न सकिने अवस्था त छैन। भन्सार यार्डमा गाडीहरू राखिएका थिए। कतिपय गाडी निकाल्न पर्यो भनेर गएका पनि परेका छन्,’ उनले भने।
त्यस्तै भन्सार यार्डमा निर्माणको काम पनि भइरहेको थियो। कतिपय चिनियाँ नागरिक तथा नेपाली नागरिकहरू त्यहीँ बसोबास गर्थे।
‘भन्सारको ड्राइपोर्ट पनि छ। त्यहाँ काम भइरहेको थियो। दिनभरि काम गरेर थाकेर सुतेका थिए होलान्। चिनियाँहरू पनि त्यहीँ बस्थे,’ उनले भने, ‘त्यही बेला परेको हुन सक्छ। अहिले खोजीका लागि सुरक्षाकर्मीहरू छन्। तर धमिलो पानी भएकाले खोजी हुनसकेको छैन।’
ड्राइपोर्टका केही भाग डुबानमा छन्, कतिपय बगाएको हो।
बाढीपछि त्यहाँका सबै संरचना शून्यमै पुगेको पनि उनले बताए।
‘त्यहाँ केही संरचना नै रहेन। अब सबै शून्यदेखि नै काम थाल्नुपर्ने हुन्छ,’ उनले भने।
जिल्ला प्रहरी कार्यालय रसुवाका डिएसपी हेम शाहीले पनि भन्सार यार्डमा रहेकाहरू नै बेपत्ता भएको हुनसक्ने बताए।
‘भन्सार यार्डमा निर्माणको काम भइरहेका कारण कामदारहरू त्यहीँ थिए। उनीहरूलाई बाढीले बेपत्ता बनायो ,’ उनले भने, ‘तीन जना प्रहरी उद्धार गर्न जानुभएको थियो उहाँहरू पनि बेपत्ता हुनुभयो।’
त्यही क्षेत्रबाट सुरक्षाकर्मीले ९ जनाको उद्धार समेत गरेको छ।
बाढीले उत्तरगया गाउँपालिका-१ मैलुङ स्थित नेपाली सेनाको पोष्ट अगाडि गल्छि बेत्रावती- स्याफ्रुबेसी नयाँ सडकखण्ड त्रिशूली नदीमा रहेको बेलीब्रिज बगाएको छ।
त्यस्तै नजिकै रहेको नवनिर्मित पक्की पुलमा लेदो माटो जम्मा भएको छ।
त्रिशुली थ्री-ए जलविद्युत आयोजनाको ड्याममा पनि क्षति पुगेको सहप्रवक्ता एवं सशस्त्र प्रहरी बलका डिएसपी शैलेन्द्र थापाले जानकारी दिए।
बेपत्ता १८ जनाको पहिचान खुल्यो:
बेपत्ता हुनेमा प्रहरी सहायक निरीक्षक लालबहादुर श्रेष्ठ, प्रहरी जवान मुन्ना ठाकुर र लोकेन्द्र बोहोरा छन्।
चिनियाँ नागरिकहरू यु युइ, ली हुवाछिन, याङ चुआन, यु हाइ हाङ, यु छिआओ छुइ र जोउ योङ बेपत्ता छन्।
त्यस्तै तीन जना गाडी चालक समेत छन्।
बर्दियाका जिपन चौधरी, सन्तोष दइत, बुद्धिराम थारू, लक्ष्मीनारायण थारू, सुरेश थारू, बागलुङका नरेन्द्र विक, सिन्धुपाल्चोकका फुर्वा लामा, गोविन्द मोक्तान र लोकमान तामाङ बेपत्ता छन्।
लामा, मोक्तान र तामाङ गाडी चालक हुन्।
-1751952786.jpeg)
-1746009348.jpg)
