जापानमा दुई सातायता लगातार भूकम्प गइरहेको छ।
जापानको दक्षिणी कागोशिमा प्रान्तस्थित क्युशुको टोकारा टापुमा लगातार भूकम्प गइरहेको त्यहाँको मौसम विभागले जनाएको छ।
दुई हप्ताको अवधिमा ९ सय वटाभन्दा बढी भूकम्पको धक्काहरू रेकर्ड भएको विभागलाई उद्धृत गरेर बेलायती पत्रिका द गार्डियनले लेखेको छ।
त्यस क्षेत्रमा गएको जुन २१ देखि साना ठूला कम्पनहरू आइरहेका छन्।
त्यसको एक-दुई दिन अघिदेखि भूकम्पका स-साना धक्का महसुस भए पनि जुन २१ बाट भने छिन-छिनमै भूकम्प गइरहेको भनेर गार्डियनले लेखेको छ।
बुधबार ३:३० बजे ५.५ म्याग्नेच्युडको भूकम्प गए पछि विभागको भूकम्प तथा सुनामी हेर्ने शाखाले पत्रकार सम्मेलन गरेर लगातार गइरहेको भूकम्पबारे जानकारी दिएको थियो।
शाखाका निर्देशक आयताका इबिताले टोकारामा दुई सातामै ९०० पटकभन्दा बढी धक्का रेकर्ड भएको बताएका हुन्।
भूकम्पको ठूलो धक्का ५.५ म्याग्नेच्युडको रहेको उनले बताइन्। लगातार हल्लाएको भए पनि मानवीय र भौतिक क्षती भने नभएको उनले बताए।
टोकारामा करिब ७०० मानिसहरूको बसोबास रहेको गार्डियनले लेखेको छ।
उनीहरूले विगत दुई सातादेखि चैनको निद्रा पाएका छैनन्। अहिले गइरहेको भूकम्पको धक्का धेरै ठूलो नभए पनि लगातार जाँदा मानिसहरू अताल्लिएका छन्। यसले ठूलो भूकम्प आउने हो कि भन्ने त्रास बढेको पनि निर्दशक इबिताले बताएका छन्।
'अब त जतिबेला पनि हल्लाइरहेको महसुस हुन थाल्यो। निदाउन समेत समस्या भएको छ,' टोकाराका एक स्थानीयले भनेका छन्।
'यो कहिले अन्त्य हुन्छ भन्ने निश्चित भएन। अब परिवारसहित यो ठाउँ नै छाड्नुपर्छ जस्तो लाग्छ,' अर्का व्यक्तिले स्थानीय सञ्चारमाध्यमसँग भनेका छन्।
सरकारी तथ्यांकले दिनमै सय भन्दा धेरै पटक भूकम्प गएको जनाएको छ।
२३ जुनमा एकै दिन १८३ पटक भूकम्प गएको थियो। त्यसको दुई दिनमा कम्पनहरू कम हुँदै गएको थियो। जुन २६ मा १५ पटक र जुन २७ मा १६ पटक भूकम्पको धक्का महसुस भएको हो।
जुन २८ देखि पुनः बढ्न थालेको थियो। जुन ३० मा एकैदिन ६२ वटा पराकम्प रेकर्ड भएको रेकर्ड भएको विभागले जनाएको छ।
जापान धेरै भूकम्प जाने प्रमुख देशमा पर्छ। सानातिना धक्काहरू त्यहाँका मानिसहरूलाई परवाह हुँदैन। जापानमा एक वर्षमा कम्तिमा १५ सय वटा भूकम्पका साना ठूला भूकम्पको धक्का महसुस गर्छन्। यद्यपि लगातार आएपछि मानिसहरू सशंकित भएका छन् भनेर गार्डियनले लेखेको छ।
जापानमा आगामी तीन दशकभित्र ठूलो भूकम्प आउँछ भन्ने प्रक्षेपण गरिएको छ। भूकम्पको तीव्रता ८ देखि ९ म्याग्नेच्युडको हुने र त्यसमा झन्डै ३ लाख मानिसहरूको मृत्यु हुने र २ ट्रिलियन डलरको क्षति हुन सक्ने अनुमान छ।
जापान सरकारले भूकम्पबाट मानवीय क्षति ८० प्रतिशतले घटाउन सन् २०१४ देखि काम गरिरहेको छ तर १० वर्षको अवधीमा २० प्रतिशत मात्रै घटाएको गार्डियनको समाचारमा उल्लेख छ।
अधिकारीहरूले लगातार पराकम्प आइरहेका कारण ६ म्याग्नेच्युडको भूकम्पको जोखिम रहेको बताउँदै मानिसहरूलाई सतर्क रहन अनुरोध गरेको छ। सुनामीको जोखिम भने उद्घोष गरेको छैन।
जापानमा २०२४ को नयाँ वर्षमा भूकम्पबाट ६०० जना मानिसहरूको मृत्यु भएको थियो। त्यसअघि सन् २०११ मा ९ म्याग्नेच्यूडको भूकम्पपछि आएको सुनामीले १८ हजार मानिसहरू मारिएका थिए।
-1746009348.jpg)
