रोल्पाकी एक महिला र हुम्लाका दुई युवक लागुऔषधसहित कैलालीमा पक्राउ परेका छन्।
रोल्पाको सुनछहारी गाउँपालिका–७ की ३२ वर्षीया पूर्णिमा पुन मगर र हुम्ला सुर्केगाड गाउँपालिका –५ का ३२ वर्षीय लोकेन्द्रबहादुर शाही र २७ वर्षीय सालु शाही कैलालीमा लागुऔषधसहित पक्राउ परेका हुन्।
कैलाली प्रहरीका प्रवक्ता डिएसपी राजकुमार सिंहका अनुसार उनीहरूको साथबाट २ किलो ७१४ ग्राम लागुऔषध अफिम बरामद भएको छ।
लागुऔषध नियन्त्रण ब्युरो र इलाका प्रहरी कार्यालय सुखडबाट प्रहरी नायब उपरीक्षक रमेशदत्त अवस्थीको कमाण्डमा खटिएको संयुक्त प्रहरी टोलीले घोडाघोडी नगरपालिका–१ सुखडबाट उनीहरूलाई सोमबार नियन्त्रणमा लिएको थियो।
डिएसपी सिंहका अनुसार रोल्पाकी मगर सुखडमा बस्दै आएकी थिइन्।
प्रारम्भिक अनुसन्धानबाट उनले रोल्पाबाट मगाएको अफिम खरिद गर्न शाहीद्वय पुगेका थिए।
उनीहरूले मगरबाट अफिम खरिद गरी छिमेकी देश भारतमा पठाउने उद्देश्य रहेको भन्ने कुरा खुलेको छ।
पक्राउ परेका व्यक्तिहरूलाई आवश्यक कारबाहीको लागि इलाका प्रहरी कार्यालय सुखडको हिरासतमा राखेर थप अनुसन्धान भइरहेको प्रहरीले जानकारी दिएको छ।
-1746009348.jpg)
