काठमाडौंको बूढानीलकण्ठमा एक जना पुरूषको हत्या भएको छ।
बूढानीलकण्ठ नगरपालिका-५ टुसालमा एक जना पुरूषको हत्या आरोपमा चार जनालाई पक्राउ गरिएको जिल्ला प्रहरी परिसर काठमाडौंका एसपी अपिलराज बोहराले जानकारी दिए।
शुक्रबार राति टुसालमा बारा निजगढ नगरपालिकाका ३२ वर्षीय कृष्ण लामाको हत्या भएको थियो। उनको हत्या भएको खबरपछि शनिबार प्रहरीले चार जनालाई पक्राउ गरेको हो।
पक्राउ पर्नेमा मकवानपुर घर भई टुसाल बस्ने विकास लामा लो, निजगढ-७ का सुगन्द लामा, सौगात क्षेत्री र निसान जिम्भा छन्। उनीहरूमाथि अनुसन्धान गर्न प्रहरीले आइतबार जिल्ला अदालत काठमाडौंबाट म्याद थप गरिसकेको छ।
एसपी बोहराका अनुसार बहिनीको बर्थ-डे मनाउन भन्दै विकास लामा लोले उनीहरूलाई आफ्नो कोठामा बोलाएका थिए।
‘उनीहरू साथीहरू नै हुन्। मदिरा पिएपछि विवाद भएको रहेछ। त्यसपछि कुटपिट गरी कृष्णको हत्या गरेको खुलेको छ,’ एसपी बोहराले भने।
यस घटनामा मुख्य आरोपी विकास हुन्। प्रहरी स्रोतका अनुसार उनको र मृतक कृष्ण लामाबीच पहिले चिनजान थिएन।
विकास शुक्रबार दरबारमार्गबाट आफ्ना मामासँग कफी पिएर बेलुकी ७ बजेतिर छुटेका थिए। त्यस दिन उनकी बहिनीको जन्मदिन थियो। बूढानीलकण्ठ घर नजिकै कृष्ण लामा, सौगात क्षेत्री, निसान जिम्बा र सुकान्त लामा मदिरा सेवन गरी बसिरहेका थिए।
अरूसँग पहिल्यै चिनजान भए पनि कृष्णसँग विकासको चिनजान थिए। त्यही दिन बाँकी तीन साथीहरूले चिनाए। विकासले उनीहरू चारै जनालाई बहिनीको जन्मदिन छ भनेर घरमा बोलाएका थिए।
‘पहिल्यै परिचित नभए पनि त्यहाँ अरू साथीहरूसँगको चिनजान भएपछि कृष्णलाई पनि बोलाएका रहेछन्,’ प्रहरी स्रोतले भन्यो।
जन्मदिन मनाएर उनीहरू त्यहाँबाट बहिनीले काम गर्ने रेस्टुरेन्टमा फर्किए। पाँच जना उनीहरू राति अबेरसम्म रेस्टुरेन्टमै थिए। रातको १ बजेपछि मात्रै पाँचै जना विकासको डेरामा फर्किए र सबै जना एउटै कोठामा सुते।
विकास र कृष्ण सँगै खाटमा र अन्य तीन जना भुइँमा सुतेका थिए।
सुत्ने क्रममा कृष्णले आफ्नो संवेदनशील अंगमा समाएको र यौन दुर्व्यवहारको प्रयास गरेको प्रारम्भिक बयान विकासले दिएका छन्।
त्यसपछि आवेगमा आएर विकासले कृष्णमाथि चार/पाँच पटक मुक्का प्रहार गरेका थिए। खुट्टाले समेत हिर्काएपछि कृष्ण रगताम्मे भएर लडेका थिए।
अरू साथीहरूले छुट्ट्याउने कोसिस गरेका थिए। तर उनको त्यहीँ मृत्यु भयो। अस्पतालमा पनि लैजाने स्थिति नभएपछि उनीहरूले शव त्यहीँ राखेका थिए।
घटनाबारे थप अनुसन्धान भइरहेको एसपी बोहराले जानकारी दिए।
