काठमाडौंको तीनकुने घटनामा पत्रकार प्रकाशचन्द्र दाहालसँग ५ हजार धरौटी माग भएको छ।
नवराज सुवेदी संयोजक रहेको संयुक्त जनआन्दोलन समितिका जनकमाण्डर दुर्गा प्रसाईंको गाडी भित्रबाट भिडिओ खिचेको आरोप लागेका दाहाललाई काठमाडौं जिल्ला अदालतका न्यायाधीश रेशराज शर्माको इजलासले बुधबार पाँच हजार धरौटी मागेको हो।
उनी नेपाल पुकार डटकमका पत्रकार हुन्। उनीविरूद्ध आपराधिक उपद्रव र संगठित अपराधको कसुर गरेको आरोप थियो।
उनले तीनकुनेको घटनामा दुर्गा प्रसाईंले प्रहरीको घेरा तोडेर गाडी चलाउँदा भित्र बसेर भिडिओ खिचेको भन्दै प्रहरीले पक्राउ पुर्जी जारी गरेको थियो।
काठमाडौं जिल्ला अदालतले मंगलबार मात्रै राप्रपाका वरिष्ठ उपाध्यक्ष रवीन्द्र मिश्रलाई ३ लाख र सोमबार सांसद धवलशम्शेर राणालाई ३ लाख धरौटीमा छाड्न आदेश दिएको थियो। त्यसअघि गत बिहीबार अदालतले दुर्गा प्रसाईंसहित ७ जनालाई पुर्पक्षको लागि थुनामा पठाउन आदेश दिएको थियो। बाँकी प्रतिवादीलाई धरौटी माग भएको थियो।
