पोखरामा प्याराग्लाइडिङ ल्यान्डिङ गर्ने क्रममा दुर्घटनामा परेको छ।
पोखरा महानगरपालिका–१८ तोरेपानीबाट उडेको २ वटा प्याराग्लाइडिङ ल्यान्डिङ गर्ने क्रममा अनियन्त्रित भई बुधबार दिउँसो फेवातालको बीचमा खसेको हो।
दुई वटा प्याराग्लाइडिङ एकैपल्ट दुर्घटनामा परेको थियो। जसबाट चार जनाको सकुशल उद्धार गरिएको सशस्त्र प्रहरीको सहप्रवक्ता शैलेन्द्र थापाले जानकारी दिए।
उनका अनुसार भारतको बनारस घर बताउने ४१ वर्षीय अकलेस यादव, ३५ वर्षीय चन्दनकुमार पटेल तथा अग्नि प्याराग्लाइडिङका पाइलट ३० वर्षीय मिलन शाह र ह्याप्पी फ्लाई प्याराग्लाइडिङका पाइलट २८ वर्षीय विश्वास अधिकारीलाई सकुशल उद्धार गरेको हो।
दुर्घटनालगत्तै सशस्त्र प्रहरी बल नेपालको नम्बर २४ कालिका गण कास्कीबाट फेवा रेस्क्यु टावरमा खटिएका सुरक्षा फौजले उनीहरूलाई उद्धार गरेको सहप्रवक्ता थापाले बताए।
