हाल देशको पश्चिम र मध्य भू–भागमा पश्चिमी वायु तथा स्थानीय वायुको प्रभाव रहेको छ भने कोशी प्रदेशका अधिकांश भू–भागमा मनसुनी वायुको प्रभाव रहेको जल तथा मौसम विज्ञान विभाग, मौसम पूर्वानुमान महाशाखाले जानकारी दिएको छ।
सोमबार दिउँसो कोशी प्रदेशलगायत देशको पहाडी भू–भागमा आंशिक देखि साधारणतया बदली रही बाँकी भू–भागमा मुख्यतया सफादेखि आंशिक बदली रहनेछ। कोशी प्रदेशका थोरै स्थानहरू तथा बाँकी प्रदेशका पहाडी भू–भागका एक–दुई स्थानहरूमा मेघगर्जन/चट्याङसहित हल्कादेखि मध्यम वर्षाको सम्भावना रहेको छ। देशका उच्च–पहाडी तथा हिमाली भू–भागका एक–दुई स्थानमा हल्का वर्षा/हिमपातको सम्भावना रहेको छ।
कोशी प्रदेश लगायत देशको पहाडी भू–भागमा आंशिक बदली रही बाँकी भू–भागमा मुख्यतया सफा रहनेछ।
कोशी प्रदेश, गण्डकी प्रदेश, कर्णाली प्रदेश, र सुदुरपश्चिम प्रदेशका पहाडी भू–भागका एक–दुई स्थानमा मेघगर्जन/चट्याङ सहित हल्का देखि मध्यम वर्षाको सम्भावना रहेको छ। कोशी प्रदेश, र गण्डकी प्रदेशका उच्च–पहाडी तथा हिमाली भू–भागका एक–दुई स्थानमा हल्का वर्षा/हिमपातको सम्भावना रहेको छ।
यसैबीच मौसमविद् विनोद पोखरेलले सोमबार र मंगलबार अझै गर्मी बढ्ने प्रक्षेपण गरेका छन्। सोमबार देशका विभिन्न भागमा वर्षाको सम्भावना नदेखिएको तर मंगलबारबाट पानी पर्न सुरूआत गर्ने बताएका छन्।
बुधबारदेखि तापक्रम घट्दै जाने र वर्षा बढ्दै जाने उनले बताएका छ्न। यो हप्ताभरिमा मनसुन नेपालभर विस्तार हुने उनले बताएका छन्। ११ दिनदेखि मनसुन कोशी प्रदेशबाट अघि बढ्न सकेको छैन। बिहीबादेखि केही ठाउँमा भारी वर्षा हुने उनको प्रक्षेपण छ।
