शुक्रबार झापाको कनकाई नगरपालिका–२ मा करेन्ट लाग्दा आठ जना घाइते भएका छन्। जिल्ला प्रहरी कार्यालय झापाका अनुसार हात्ती छेक्न लगाइएको तारबाट करेन्ट लाग्दा उनीहरू घाइते भएका हुन्।
स्थानीय फरकबहादुर बस्नेतको केरसाबारीमा बोडी टिप्न जाँदा उनीहरूलाई करेन्ट लागेको थियो।
घाइते हुनेमा ४४ वर्षीय तुलाराम कार्की, २२ वर्षीया लक्ष्मी चौहान, ३५ वर्षीय गोपाल बस्नेत, ५८ वर्षीया डम्बरकुमारी बस्नेत, ६४ वर्षीय फरकबहादुर बस्नेत, २६ वर्षीया अनु खड्का, २२ वर्षीया सन्ध्या कार्की र १८ वर्षीय सलिन कार्की छन्।
घाइतेहरूको बिएण्डसी अस्पताल विर्तामोडमा उपचार भइरहेको र सबै जनाको अवस्था सामान्य रहेको प्रहरीले जनाएको छ।
शुक्रबारै झापाकै कमल गाउँपालिका–२ तोपगाछीमा बाथरुमा चिप्लिएर एक जनाको मृत्यु भएको प्रहरीले जनाएको छ। मृत्यु हुनेमा स्थानीय ९३ नरप्रसाद पौडेल छन्।
आफ्नै घरको बाथरूमबाट निस्किने क्रममा चिप्लिएर लड्दा उनी घाइते भएका थिए। उनलाई उपचारका लागि विराटनगरस्थित टिचिङ अस्पतालमा लगिएको थियो।
उपचारकै क्रममा सोही अस्पतालमा उनको मृत्यु भएको जिल्ला प्रहरी कार्यालय झापाका प्रवक्ता खगेन्द्रबहादुर खड्काले बताए।
