विपद् जोखिम न्यूनीकरण तथा व्यवस्थापन प्राधिकरणले यस वर्षको मनसुनमा नेपालमा २० लाख मानिसहरू प्रभावित हुने आकलन गरेको छ।
राष्ट्रिय विपद् जोखिम न्यूनीकरण तथा व्यवस्थापन कार्यकारी समितिको बैठकले मनसुन पूर्वतयारी तथा प्रतिकार्य राष्ट्रिय कार्ययोजना २०८२ पारित गर्दै यस वर्षको मनसुन ऋतुमा ४ लाख ५७ हजार १४५ घरधुरीका १९ लाख ९७ हजार ७३१ जनसंख्या प्रभावित हुने आकलन गरेको हो।
जल तथा मौसम विज्ञान विभागले यस वर्षको मनसुन ऋतुमा देशका अधिकांश स्थानमा सरदरभन्दा ६५ प्रतिशतसम्म बढी वर्षा हुने आकलन गरेको छ।
विशेषतः लुम्बिनी प्रदेशको उत्तर, कर्णाली प्रदेश र गण्डकी प्रदेशका अधिकांश भागमा सरदरभन्दा ५५ देखि ६५ प्रतिशतसम्म बढी वर्षाको आकलन गरिएको छ। त्यस्तै यस वर्ष सरदरभन्दा बढी तापक्रम हुने पनि अनुमान गरिएको छ।
प्राधिकरणले काठमाडौंको चोभार गल्छी साँघुरो भएकाले गत वर्ष असोज १० गतेदेखि १३ गतेसम्म परेको अविरल वर्षाको कारण बागमती नदीमा पानीको सतह बढ्न गएको निष्कर्ष निकालेको छ। गत असोज १० देखि १३ गतेसम्म काठमाडौं उपत्यकाका केही ठाउँमा रेकर्डब्रेक वर्षा भएको थियो।
त्यतिबेला काठमाडौं उपत्यकाका नख्खु, कुलेश्वर, थापाथली, बल्खु लगायतका भू–भागहरूमा डुबान भएको थियो। उक्त प्रकारको क्षति हुन नदिन कार्यकारी समितिको बैठकले नेपाली सेनाबाट सहयोगमा चोभार गल्छीमा रहेको अवरोध हटाउन सहरी विकास मन्त्रालयलाई निर्देशन दिने निर्णय पनि गरेको प्रवक्ता रामबहादुर केसीले जानकारी दिए।
-1720267212.jpg)
