माछापोखरी आसपासका सडक किनारा क्षेत्रमा बिहान साँढे सात बजेसम्म तरकारी लगायत उत्पादन बेच्ने सहमति भएपछि काठमाडौं महानगरपालिकाको फोहोर बिसर्जनमा स्थानीयले गरेको अवरोध हटेको छ।
बालाजु प्रहरी वृत्तमा शुक्रबार मध्याह्न काठमाडौं महानगरपालिका, नुवाकोट ककनी र तारकेश्वरका जनप्रतिनिधि, स्थानीयबीच छलफल भएको थियो।
माछापोखरीदेखि नुवाकोटतर्फ जाने चोकसम्मको भागमा बिहान साढे सात बजेसम्म तरकारी लगायत स्थानीयको उत्पादन बेच्न दिन महानगर तयार भएको वातावरण व्यवस्था विभाग प्रमुख सरिता राईले जानकारी दिइन्।
‘बिहान साढे सात बजेसम्म उहाँ (स्थानीय) हरूलाई माछापोखरी आसपास क्षेत्रमा तरकारी बेच्न दिइनेछ। साढे सातबजेसम्म तरकारी र त्यसका अवशेष उठाइसक्नुपर्नेछ,’ उनले भनिन्, ‘यो अर्को व्यवस्था नभइञ्जेलका लागि हो, दीर्घकालीन होइन।’
काठमाडौं महानगरपालिकाले माछापोखरी क्षेत्रमा तरकारी बेच्न नदिएपछि तारकेश्वर र नुवाकोटका स्थानीय बासिन्दाहरूले शुक्रबार फोहोरका गाडीहरूलाई बाटोमै रोकेका थिए।
स्थानीयको अवरोधपछि काठमाडौं उपत्यकाबाट फोहोर बोकेर गएका दुई सयभन्दा बढी गाडीहरू तीनपिप्ले र कागतीगाउँ क्षेत्रमा रोकिएका थिए।
काठमाडौं उपत्यकाबाट दिनहुँ १५ सय टनभन्दा बढी फोहोर बन्चरेडाँडास्थित ल्याण्डफिलसाइट जाने गरेको छ।
काठमाडौंका सबै स्थानीय तह, ललितपुर महानगर, महालक्ष्मी नगरपालिका, भक्तपुरका भक्तपुरबाहेक स्थानीय तह र बनेपा र धादिङको धुनिवेशी नगरपालिकाको फोहोरसमेत बन्चरेडाँडामै व्यवस्थापन हुन्छ।
काठमाडौंको फोहोर २०६२ जेठ ५ गतेदेखि नुवाकोटको सिसडोल क्षेत्रमा लगिने गरिएको थियो। २०७९ साल जेठदेखि धादिङ र नुवाकोटको सीमा क्षेत्र बन्चरेडाँडामा फोहोर लैजान थालिएको थियो। त्यहाँ संघीय सरकारले करिब एक अर्ब लागतमा दीर्घकाली ल्याण्डफिल साइड बनाएको छ।
स्थानीयले फोहोर बिसर्जन गर्दै आएको बन्चरेडाँडा वरपरको करिब तीन किमी क्षेत्रलाई मध्यवर्ती क्षेत्र घोषणा गर्नुपर्ने र मुआब्जा दिनुपर्ने माग गर्दै बेलाबेला फोहोर फाल्न रोक लगाउने गर्दै आएका छन्।
यसपटक भने करिब तीन किमी वरै कागती गाउँका स्थानीयले फोहोरका गाडी रोकेका थिए।
यो पनि: काठमाडौं महानगरले माछापोखरीमा तरकारी बेच्न नदिएपछि तारकेश्वर र नुवाकोटवासीले रोके फोहोर
