त्रिभुवन अन्तर्राष्ट्रिय विमानस्थलमा चैत ३१ गते प्रहरीको लछारपछारमा परेका थिए- युएईबाट स्वदेश फर्केका युवक सञ्जय ओझा।
मोरङ घर भएका ओझा हिमालय एयरलाइन्सको जहाजबाट त्रिभुवन अन्तर्राष्ट्रिय विमानस्थलमा ओर्लिएका थिए। उनलाई लछारपछार गर्दै कुटपिट गरेको भिडिओ हिजोआज सामाजिक सञ्जालमा भाइरल छ भने प्रहरीको आलोचना भइरहेको छ।
सेतोपाटीले भिडिओमा देखिएका युवकबारे सोधखोज गर्दा उनी मोरङका सञ्जय ओझा रहेको खुल्यो। हामीले ओझासँग त्यस दिन त्रिभुवन अन्तर्राष्ट्रिय विमानस्थलमा के भएको थियो भन्नेबारे कुराकानी पनि गरेका छौं।
ओझाका अनुसार उनी युएईमा मार्केटिङको काम गर्छन्। आफन्तको विवाहमा जान उनी १० दिनको छुट्टी लिएर नेपाल आएका हुन्। करिब १० महिनापछि उनी युएईबाट नेपाल आएका थिए।
त्यस दिन विमानस्थलको आगमन कक्ष बाहिर ट्रली लिएर उभिँदा एक जना व्यक्ति आएर उनीसँग ट्याक्सी चाहिन्छ कि भनेर सोधेका थिए।
‘मलाई लिन आफन्त आउँदै थिए, ट्रली लिएर म कुरिरहेको थिएँ। एक जना मान्छे आएर ट्याक्सी चाहिएको हो भनेर सोध्नुभयो। मैले हैन, मलाई लिन आउँदैछन् भनेँ,’ उनले सेतोपाटीसँग भने, ‘पहिले ट्रली राख्न मिल्थ्यो, यहाँ ट्रली राख्न मिल्दैन भनेर उनले भने। उनले रूखो व्यवहार देखाउँदै मलाई गाली गर्न थाले।’
ती व्यक्तिले आफू विमानस्थलकै कर्मचारी भएको दाबीसमेत गरेपछि आफूले परिचय पत्र देखाउन आग्रह गरेको ओझाको भनाइ छ।
‘कर्मचारी भनेपछि मैले उहाँको आइडी देखाउनुस् भनेर भनेँ। त्यतिभन्दै गर्दा प्रहरी आएर मलाई गाली गर्न थालेका थिए। म आफ्नो देशमा आएको हो। म जाँदै नै छु भनेर भनेको थिएँ। जेब्रा क्रसिङ कटेपछि फेरि प्रहरीले गाली गर्दै आए,’ उनले भने।
त्यसपछि आफूले पनि मोबाइल निकालेर भिडिओ खिचेको उनले बताए। बाझाबाझ भएपछि प्रहरी र ट्राफिक प्रहरीले आफूलाई दुर्व्यहार गरी भित्र लगेर कुटेको ओझाको भनाइ छ।
प्रहरीले हात बटार्दा अझै पनि दुखिरहेको उनले बताए।
‘ओठमा पनि चोट पुग्ने गरी पिटे,’ उनले भने, ‘पछि हल्ला नगर जा भनेर पठाइदिएको हो। त्यत्रो हुँदा पनि के भयो भनेर कुनै वरिष्ठ प्रहरीहरू आएनन्। ममाथि अपराधीलाई जस्तो व्यवहार गरियो। ममाथि दुर्व्यहार भयो, भोलि अर्कोलाई पनि हुनसक्छ। आफ्नै देश आउँदा सुरक्षित महसुस भएन।’
उनले यस्तै व्यवहार रहिरहने हो भने अबदेखि त्रिभुवन अन्तर्राष्ट्रिय विमानस्थल प्रयोग गर्ने/नगर्नेबारे सोच्ने अवस्था आएको पनि बताए।
‘यस्तै व्यवहार गर्ने हो भने त किन यो विमानस्थलबाट आउनु र! बरू भारत हुँदै आउँछु नि!,’ उनले भने।
उनलाई दुई तीन जना प्रहरीले हातमा समाएर आगमन कक्षभित्र लगेर लछारपछार गरेको भिडिओ सामाजिक सञ्जालमा भाइरल भएको थियो।
त्रिभुवन अन्तर्राष्ट्रिय विमानस्थलमा नेपाल प्रहरीको सुरक्षा कार्यालय गौचरनले सुरक्षा दिन्छ। कार्यालयका प्रवक्ता तथा एसपी लालध्वज सुवेदीका अनुसार यो घटना आइतबार बिहान साढे ११ बजेतिरको हो।
भिडिओ भाइरल बनेपछि प्रहरीले उनको विवरण बुझ्ने काम गरेको छ। सिसिटिभी फुटेज हेर्दा उनले माथिदेखि नै ‘लफडा’ गरेको उनले बताए।
‘उहाँको अटिट्युड पनि अर्कै रहेछ, हामीले सिसिटिभी हेर्यौं। उहाँले भन्सारकै कर्मचारीसँग पनि लफडा गर्नुभएको रहेछ,’ उनले भने, ‘हामीले डिटेल निकाल्दैछौं।’
बाहिर आएपछि ट्याक्सी चालकसँग पनि लफडा गरेपछि प्रहरीले नियन्त्रणमा लिएको एसपी लालध्वज सुवेदीले दाबी गरे।
‘ट्याक्सी पनि त्यो ठाउँमा आइरहेको देखिन्छ। ट्याक्सी चालकसँग पनि लफडा गरेका रहेछन्। त्यसपछि प्रहरीले नियन्त्रणमा लिएको हो। बाहिर सम्झाउँदा पनि नमानेपछि भित्र ल्याएको हो,’ उनले भने, ‘हामीले प्रहरीसँग पनि सोध्यौं, जुत्ताले पनि हान्न खोजेको देखिन्छ।’
प्रहरीले अध्यागमन विभागसँग सम्पर्क गरी ती व्यक्तिबारे विवरण निकाल्ने काम गरेको उनको भनाइ छ।
यो पनि: त्रिभुवन अन्तर्राष्ट्रिय विमानस्थलमा प्रहरीले युवकलाई लछारपछार गरेको भिडिओ के हो?
-1744698177.jpg)
