काठमाडौंको कलंकीमा एक जनाको हत्या गरेको घटनामा प्रहरीले १७ जनालाई पक्राउ गरेको छ।
सोमबार बेलुकी साढे ७ बजे काठमाडौं महानगरपालिका-१४ कलंकीस्थित एलआरआई स्कुलनजिकै दुई समूहबीच झडप भएको थियो। झडपमा एक जनाको मृत्यु भएको थियो। तीन जना घाइते भएका छन्।
मृतक काठमाडौंको ढुंगेअड्डा बस्ने २२ वर्षीय अभय गोले छन्। उनको उपचारको क्रममा राति साढे ८ बजे मृत्यु भएको हो।
नागढुंगा बस्ने २३ वर्षीय सन्दीप भुजेल, हेटौंडा घर भई हाल पुरानो नैकाप बस्ने २२ वर्षीय चक्रे भन्ने पवन तामाङ र पासाङ शेर्पा घाइते छन्।
काठमाडौं उपत्यका अपराध अनुसन्धान कार्यालय र जिल्ला प्रहरी परिसर काठमाडौंको टोलीले १७ जनालाई पक्राउ गरेको छ।
परिसरका एसपी अपिलराज बोहोराका अनुसार यस घटनामा संलग्न अझै केही फरार छन्। घाइतेहरूमाथि पनि अनुसन्धान गर्नुपर्ने भएकाले उनीहरू पनि प्रहरीकै नियन्त्रणमा छन्।
प्रहरीका अनुसार घटनामा अहिलेसम्म प्रमुख मानिएका काठमाडौं-१४ कलंकी खड्का गाउँ बस्ने २५ वर्षीय रोहित खड्कालाई पक्राउ गरेको छ।
उनीसँगै स्युचाटार बस्ने २० वर्षीय प्रविण झेडिमगर, २३ वर्षीय नविन तामाङ, कलंकी बस्ने २७ वर्षीय राज अर्याल, पुरानो नैकाप बस्ने २६ वर्षीय जीवन श्रेष्ठ, १९ वर्षीइ साङ्गे लामा, २१ वर्षीय निश्चल तामाङ, २२ वर्षीय आषिश श्रेष्ठ, उदयपुर बस्ने २१ वर्षीय खेमराज मगर, २५ वर्षीय अजित बुढाथोकीलाई प्रहरीले पक्राउ गरेको छ।
त्यस्तै धादिङका २० वर्षीय सुजन तामाङ, १९ वर्गीय सुसान श्रेष्ठ, १९ वर्षीय डेनियल विक, २३ वर्षीय विनय आलेमगर, २० वर्षीय रन्जित श्रेष्ठ, १९ वर्षीय गौतमकुमार जोगी र प्रवेश गुरूङलाई प्रहरीले पक्राउ गरेको छ। उनीहरूलाई प्रहरीले रातभरिमा पक्राउ गरी अनुसन्धान गरिरहेको छ। १७ जना नै अहिले प्रहरी वृत्त कालिमाटीको हिरासतमा छन्।
पक्राउ परेका उनीहरूलाई प्रहरीले आज सार्वजनिक गरेको हो।
‘उनीहरूमध्ये केही मुख्य छन्। अन्य चाहि एक-दुई पटक हिर्काउने भन्ने हिसाबले गएकाहरू पनि भेटिए,’ अनुसन्धानमा संलग्न एक अधिकारीले भने।
यस्तै अझै चार जना भने फरार छन्। उनीहरूको पनि खोजी भइरहेको प्रहरीले जनाएको छ।
मुख्य दुई विषयमा भएको थियो झगडा
प्रहरीको प्रारम्भिक अनुसन्धानबाट उनीहरू पहिले एकै समूहका साथीहरू हुन्।
रोहित खड्का यो समूहका नेतृत्व गर्ने व्यक्ति जस्तै थिए। उनलाई धेरैले खरायो/र्याबिट भन्छन्।
‘उनी लिडर जस्तै हुन्। सँगै बसेर लागुऔषध खाने, स्नुकर खेल्ने खालको समूह हो यिनीहरूको,’ अनुसन्धानमा संलग्न एक अधिकारीले भने।
तर केही समय यता यही समूह दुई वटामा विभाजित भएको देखिन्छ। यस घटनामा प्रमुखमध्ये निश्चल मगर फरार छन्।
निश्चल र मृतक अभयबीच विवाद उत्पन्न भएपछि दुई वटा समूहमा विभाजित भएको रोहितले प्रहरीसमक्ष बताएका छन्।
‘होलीको एक दिन अगाडि निश्चल र अभयबीच विवाद भएको थियो। अभयले निश्चललाई झापड हानेको थियो,’ रोहितले प्रहरीसँग प्रारम्भिक बयानमा भनेका छन्, ‘निश्चल चाहि मेरो मिल्ने साथी हुन्। हुन त अरू पनि साथी नै हो तर निश्चलसँग अलि बढी मिल्थेँ।’
लागुऔषधको विषयलाई लिएर झापड हानेपछि दुई पक्षबीच खटपट सुरू भएको थियो। यही विषयलाई लिएर फेरि होलीको पर्सीपल्ट कलंकी क्षेत्रमै उनीहरू दुई पक्षबीच भेट भएको थियो। त्यहाँ पनि निश्चल र अभयबीच विवाद भएको प्रहरीले जनाएको छ।
त्यहाँ निश्चलले झगडा गर्ने भए ‘एक्लाएक्लै गरौं’ भनेको पनि रोहितले प्रहरीसँग भनेका छन्।
‘उनीहरूको त्यस्तो झगडा चलिरहेको थियो। मेरो पनि मोबाइल फोन प्रवेश गुरूङ भन्नेले चोरेको थियो,’ रोहितको भनाइ उदृत गर्दै प्रहरीले भने।
सोमबार भने यही दुई विषयलाई लिएर ठूलो झडपसम्मको स्थिति बनेको थियो।
प्रहरीका अनुसार सोमबार अभयको समूहले झडप गर्ने भनेर तयारी अवस्थामै बसेको देखिएको छ।
उनकै समूहबाट निश्चललाई मेसेज गरेर ‘झगडा गर्न’ तयार रहेको भन्ने मेसेज पठाएको पनि प्रहरीले फेला पारेको छ।
तर अभय पनि आफ्नो समूहसँग रडसहित तयारी अवस्थामा बसेका थिए। यता निश्चलले पनि आफ्ना साथी रोहितसँग कुराकानी गरेपछि उनीहरू पनि जुटे।
‘मैले उनीहरू कहाँ छन् भनेर बुझ्न लगाएँ। उनीहरू हतियारसहित छन् भनेपछि म पनि त्यहाँ पुगेको थिए। त्यहीबेला झडप सुरू भइसकेको थियो,’ रोहितले प्रहरीसँग भनेका थिए।
दुबै समूह एलआरआई स्कुल नजिकै भेट भएपछि झडपको स्थिति बनेको हो।
‘मृतकको पेट, छाती र टाउकोमा चोट लागेको छ। अन्य तीन जना सामान्य छन्,’ एसपी बोहोराले भने।
यसरी घटना भएलगत्तै प्रहरीको टोली खटिएको थियो। अपराध अनुसन्धान कार्यालयबाट पनि प्रहरीको टोली खटियो। उक्त टोलीले सुरूमै रोहितलाई पक्राउ गरेको थियो। रोहितलाई पक्राउ गरेपछि भने अन्य व्यक्तिहरूको पहिचान गर्न सहज भएको प्रहरीको भनाइ छ।
‘सुरूमा रोहित पक्राउ परे। त्यसपछि अन्य व्यक्तिहरूको राति नै घर घरमा पुगेर पक्राउ गर्यौं,’ अनुसन्धानमा संलग्न प्रहरीले भने।
प्रहरी वृत्त कालिमाटीले भने अहिले पक्राउ परेका व्यक्तिहरूको स्क्रिनिङ गरिरहेको एसपी बोहोराले बताए।
कसले रड प्रहार गरे, कसको भूमिका के कस्तो हो भन्नेबारे अनुसन्धान अघि बढाएको छ।
-ink-1720175471.jpeg)
