सोमबारदेखि सामाजिक सञ्जाल फेसबुक लगायतमा महिलालाई खुकुरी प्रहार गर्न खोजेको देखिने भिडिओ भाइरल छ।
यो घटना दोलखाको बैतेश्वर गाउँपालिका वडा नम्बर ६ को रहेको खुलेको छ।
भाइरल भिडिओ र घटनाबारे हामीले दोलखा प्रहरीलाई सोधेका छौं।
प्रहरीले यो घटना अंशबन्डा झगडासँग सम्बन्धित रहेको बताएको छ। फूपुका छोराले मामाको छोरीमाथि खुकुरी प्रहारको प्रयास गरेका हुन्।
बैतेश्वर गाउँपालिका वडा-६ की ४१ वर्षीय उषा तामाङमाथि सोमबार बिहान ९ बजे खुकुरी प्रहारको प्रयास भएको हो।
बाटोमा हिँडिरहेकी तामाङलाई मामाको छोरा सुन्दर अधिकारीले धकेलेर खुकुरी देखाएको जिल्ला प्रहरी कार्यालय दोलखाका प्रहरी निरीक्षक दाताराम अधिकारीले बताए।
'खुकुरी प्रहार हुन लाग्दा स्थानीयले देखेपछि उनी त्यहाँबाट भागेकी थिइन्। उनीहरूबीच अंशवन्डाको झगडा चलिरहेको रहेछ, त्यहीकारण उनीमाथि खुकुरी प्रहारको प्रयास भएको देखियो,' उनले भने।
उनकाअनुसार अंशवन्डाको विवादमा मामाको छोरा अधिकारीले जिल्ला अदालतबाट मुद्दा जितेका थिए। त्यसपछि उषा उच्च अदालतमा पुनारावेदन दिएपछि त्यही आक्रोशमा खुकुरी प्रहार प्रयास गरेको प्रहरी अनुसन्धानमा खुलेको छ।
उषा बैतेश्वर माध्यामिक विद्यालयकी शिक्षिका हुन्। विद्यालयबाट फर्किदै गर्दा उनीमाथि खुकुरी प्रहारको प्रयास भएको हो।
दुवै जना एउटै टोलका हुन्। उनको अवस्था सामान्य छ। सुन्दरलाई भने प्रहरीले पक्राउ गर्ने तयारी गरेको छ।
