अन्तरजातीय विवाह गरेका दलित युवामाथि अत्याचार गरेको आरोपमा गृहमन्त्री रमेश लेखकमाथि कारबाहीको माग गर्दै दलित अभियन्ताले सरकारी वकिल कार्यालय काठमाडौंमा जाहेरी दिएका छन्।
आइतबार सरकारी वकिलको कार्यालय पुगेर दलितका लागि दलित अभियानका संयोजक खगेन्द्र सुनारले जाहेरी दिएका हुन्।
जाहेरी अनुरूप अवश्यक अनुसन्धान गरी प्रक्रिया अगाडि बढाउने सरकारी वकिल कार्यालयले प्रतिबद्धता व्यक्त गरेको अभियानका अभियन्ता रेम रसाइलीले जानकारी दिए।
सरकारी वकिल कार्यालय काठमाडौंका प्रमुख एवं सहन्यायाधिवक्ता रामहरि शर्मा काफ्लेले पनि अधिकारकर्मीहरू जाहेरी लिएर आएको पुष्टि गरे। यद्यपि जाहेरीको प्रक्रिया नपुगेको उनले बताए।
‘अधिकारकर्मीहरू आउनुभएको थियो। उहाँहरूले जाहेरी दिनुभएको छ। तर प्रक्रिया पुगेको छैन, यसबारे मैले उहाँहरूलाई जानकारी गराएँ,’ काफ्लेले भने, ‘अध्ययनका लागि भनेर उहाँहरूले एउटा कागज छोड्नुभएको छ। मैले हेर्न पाएको छैन।’
गृहमन्त्री लेखकमाथि कानुनी कारबाही अगाडि बढाउन भन्दै सुनारले राष्ट्रिय मानव अधिकार आयोग र दलित आयोगलाई पनि ध्यानाकर्षण गराएका छन्।
सर्लाहीको बरहथवाका नेहा रौनियार र सत्येन्द्र रामको प्रेमविवाहमा गृहमन्त्री लेखकको निर्देशनमा छुटाउन खोजिएको आरोप छ।
कानुनी रूपमा योग्य मानिएको विवाहलाई जातीय विभेद गर्दै छुट्टाउन भूमिका खेलेको समाचार बाहिरिएको थियो। त्योसँग दलित अभियान्ताहरूले गृहमन्त्री लेखकको राजीनामा माग्दै सडकमा प्रदर्शन गरिरहेका छन्।
बिहीबार दलित सांसदहरूले संसदमा समेत आवाज उठाएका थिए। ससंदमा उठेको प्रश्नबारे गृहमन्त्री लेखकले भने यो घटनामा राज्यपक्षबाट हस्तक्षेप नभएको बताएका छन्।
-1739099713.jpg)
