ललितपुरको पाटनबाट चार वर्षीय बालकको अपहरण आरोपमा प्रहरीले भियतनामका नागरिकलाई पक्राउ गरेको छ।
माघ २४ गते बेलुकी सवा ८ बजेतिर ललितपुर महानगरपालिका वडा नम्बर १२ पाटनबाट चार वर्षीय बालक पल चेपाङलाई अपहरण गरेको भन्दै काठमाडौं उपत्यका प्रहरी कार्यालयले भियतनामका २३ वर्षीय माइ होङ किन्लाउनलाई पक्राउ गरेको हो।
प्रहरीले माघ २५ गते नै ती बालकलाई कलंकीबाट उद्धार गरेको थियो। कलंकीस्थित इलाम मेची गेष्ट हाउसको कोठामा बन्धक बनाइराखेको अवस्थामा प्रहरीले बालकलाई उद्धार गर्यो भने त्यहीँबाट भियतनामी नागरिक पक्राउ परेका हुन्।
यस घटनामा अनुसन्धान गरिरहेका एक प्रहरीका अनुसार बालकलाई भियतनामी नागरिकले भारतको पन्जाब लैजाने तयारी गर्दै थिए। बालकलाई बेचबिखनका लागि लैजान अपहरण गरेको भन्ने प्रारम्भिक अनुसन्धानबाट खुलेको छ।
‘उनको गतिविधि हेर्दा अपहरण गरेर भारतमा बेच्न लागेको जस्तो देखिन्छ,’ ती प्रहरीले भने।
भियतनामी नागरिक सन् २०२३ डिसेम्बर २७ तारिदमा पहिलो पटक नेपाल आएका थिए। तर उनी त्यतिबेला ११ दिन मात्रै बसेर भारतको नयाँ दिल्ली फर्किएका थिए।
सन् २०२४ अप्रिल २७ मा उनी भारतको पन्जाबबाट सडकमार्ग हुँदै फेरि नेपाल आएको देखिन्छ। त्यसयता उनी काठमाडौंमा होटल फेर्दै बसोबास गर्दै आएका थिए।
प्रहरीको अनुसन्धानबाट उनी सुरूमा काठमाडौंको स्वयम्भूस्थित होटलमा दुई महिना, ठमेलको होटलमा एक हप्ता, बानेश्वरको एक बोइज होस्टलमा विगत ६ महिनादेखि बस्दै आएका थिए।
काठमाडौंमा बसेर उनले विभिन्न भाषा सिक्दै आएका थिए। स्वयम्भू, कपन, बौद्धलगायत विभिन्न गुम्बाहरूमा पनि उनले लामा भाषा सिकेका थिए।
घुमघाम गर्न भने उनी प्राय: ललितपुरको पाटन दरबार स्क्वायर जाने गरेको प्रहरी अनुसन्धानबाट खुलेको छ। घुमफिरकै क्रममा डिसेम्बर २५ मा क्रिसमसको साँझ साढे ८ बजेतिर पाटनमा ४ वर्षीय पल र उनका दाइसँग भेट भएको थियो।
त्यही भेटमा उनले दुवै दाजुभाइलाई चिप्स, चकलेट किनेर दिए र निकटता बढाए।
‘उनले चकलेट दिएर लोभ्याएको देखिन्छ,’ ती प्रहरीले भने, ‘पटक-पटक त्यहीँ गएर बालकहरूसँग खेल्ने, खानेकुरा दिने गरेको पाइयो।’
बालक पललाई उनले माघ २४ गते पाटनबाट अपहरण गरेका थिए। घटनाबारे खबर पाएपछि प्रहरीले सिसिटिभी फुटेज संकलन गरेर अनुसन्धान थालेको थियो। कृष्ण मन्दिर नजिकै ढालचा चोकबाट ट्याक्सीमा चढाएर बालक लगेको देखिएको थियो।
सिसिटिभी फुटेजमा देखिएका युवाबारे आमा सरिता तामाङलाई प्रहरीले सोधेको थियो। उनले चिन्न सकिनन्।
अनुसन्धानकै क्रममा ट्याक्सी इन्ड्राइभमार्फत बुक गरेको खुल्यो।
झम्सीखेलसम्म एउटा ट्याक्सीमा आएर पुन: अर्को ट्याक्सी बुक गरेको फेला पर्यो। त्यो ट्याक्सी बुक गरेर काठमाडौंको सुन्धारा स्थित श्री गुरू होटलमा बसेको भेटियो।
भोलिपल्ट बिहान साढे १० बजेतिर काठमाडौंबाट वीरगञ्ज जाने न्यू साजन एसी सोफा विथ स्लिपर कोचको बस नम्बर ६८१८ नम्बरमा दुई वटा सिट बुक गरेको देखिएको प्रहरीको भनाइ छ।
गाडी चढेर जान सजिलो हुन्छ भनेर उनले कलंकीको इलाम मेची गेष्ट हाउसमा बसेका थिए। बालक र उनी त्यहीँको १०७ नम्बर कोठामा बसेका थिए।
‘सुन्धारामा बसे तर भोलिपल्ट त्यहाँबाट वीरगन्ज जान सजिलो हुन्छ भनेर कलंकीको होटलमा बसे,’ ती प्रहरीले भने।
उनकाअनुसार बालकलाई वीरगञ्ज हुँदै भारतको पन्जाब पुर्याउने योजना रहेको खुलेको छ।
भियतनामी नागरिक नेपालीसमेत बोल्छन्। उनलाई १७ वटाभन्दा बढी भाषा आउने अनुसन्धानको क्रममा खुलेको छ।
प्रहरीले उनीबाट तीन वटा मोबाइल, एउटा ल्यापटप, २० हजार भियतनामी मुद्रा, दुई वटा भारतीय आधार कार्ड, एउटा चक्कु र बसको टिकट फेला परेको छ।
प्रहरीले घटनाबारे थप अनुसन्धान अघि बढाएको छ।
-1739089898.jpg)
