रूपन्देहीमा श्रीमतीको हत्या आरोपमा श्रीमान पक्राउ परेका छन्।
देवदह नगरपालिका-९ भलुही बस्ने ५० वर्षीय दशरथ चौधरी पक्राउ परेका हुन्।
उनलाई अस्थायी प्रहरी पोष्ट भलुही र इलाका प्रहरी कार्यालय बुटवलबाट खटिएको टोलीले मंगलबार साँझ पक्राउ गरेको हो।
उनले ४० वर्षीया श्रीमती सुनिता भट्टराई चौधरीको हत्या गरेको आरोप छ। सुनिता उनको कान्छी श्रीमती हुन्।
दशरथले चक्कु प्रहार गर्दा घाइते भएकी सुनितालाई देवदह मेडिकल कलेज भलुही पुर्याइएको थियो। उपचारको क्रममा मृत्यु भएको प्रहरीले जनाएको छ।
उनको मृत्युपछि तत्काल दशरथलाई पक्राउ गरिएको प्रहरीले बताएको छ।
के कारणले हत्या गरिएको थियो भन्ने खुलिसकेको छैन। यस घटनामा प्रहरीले थप अनुसन्धान गरिरहेको छ।
