कैलालीको गौरीगंगामा एम्बुलेन्स र मोटरसाइकल ठोक्किँदा सशस्त्र प्रहरीका एक सहायक हवल्दारको मृत्यु भएको छ।
पूर्वपश्चिम महेन्द्र राजमार्ग अन्तर्गत गौरीगंगा नगरपालिका–९ शंकरपुरमा भएको दुर्घटनामा मोटरसाइकलको पछाडि सवार ३६ वर्षीय गोरख ऐरको मृत्यु भएको हो।
उनी सशस्त्र प्रहरी बेस क्याम्प पहलमानपुरमा कार्यरत थिए। पश्चिमबाट पूर्व तर्फ गईरहेको से १ च १८२८ नम्वरको ओमसाई अस्पतालको एम्बुलेन्स र पूर्वबाट पश्चिम तर्फ आईरहेको म २ प ५३०३ नम्बरको मोटरसाइकल एक आपसमा ठोक्किँदा दुर्घटना भएको थियो।
दुर्घटनामा परेर मोटरसाइकल चालक घोडाघोडी नगरपालिका– १० का २८ वर्षीय भरत बोहरा घाइते भएका छन्।
दिउँसो साढे १२ बजेतिर भएको दुर्घटनामा गम्भीर घाइते भएका उनलाई उपचारका लागि घोडाघोडी अस्पतालमा ल्याएपछि मृत्यु भएको कैलालीका प्रहरी प्रवक्ता डिएसपी दक्ष कुमार बस्नेतले बताए।
एम्बुलेन्स चालक धनगढी उपमहानगरपालिका–१० का आशाराम चौधरीलाई इलाका प्रहरी कार्यालय सुखडले नियन्त्रणमा लिएको बस्नेतले बताए।
