व्यक्ति र सवारी साधन कसरी निस्संक्रमण गर्ने? हेर्नुस् सेनाको ‘डेमो’ (फोटोफिचर)

नारायण महर्जन

काठमाडौं,वैशाख ५

छाउनीस्थित महावीर रेञ्जर रेजिमेन्टमा सेनाले कोरोनाभाइरसको महामारी फैलिएमा सोको सेवामा खट्ने सवारीसाधन र सेनालाई निस्संक्रमण बनाउने सेवाको अभ्यास गरेको छ।

संक्रमित व्यक्तिलाई उद्दार गरिसकेपछि वा शवको व्यवस्थापन गरिसकेपछि सोमा प्रयोग गरिने सवारीसाधन र सेवामा खटिने व्यक्तिलाई समेत संक्रमण हुन सक्ने र भाइरस फैलिने जोखिमलाई मध्यनजर गर्दै सेनाले यो अभ्यास गरेको हो।

संक्रमितलाई सेवा दिइसकेपछि सवारीसाधनलाई भाइरसमुक्त बनाउने र सेवामा खटिने कर्मचारीलाई सुरक्षित बनाउने अभ्यास सेनाले गरेको हाे।

संक्रमितलाई उद्दार गरेको सवारीसाधनलाई पहिले निस्संक्रमण गर्ने, घाममा सुकाउने र अर्को अभियानका लागि तयार राख्ने अभ्यास गरिएको छ।

त्यस्तै व्यक्तिका हकमा संक्रमितको उद्दारमा खटिएका सबैले नुहाउने, त्यसपछि डिस्इन्फेक्सन स्प्रे छर्किने र नयाँ ड्रेस लगाउने, स्वास्थ्य परीक्षण गर्ने र पुनः अर्को अभियानका लागि तयार रहने अभ्यास गरियो।

सो क्रममा पुनः प्रयोग गर्न मिल्ने पिपिईलाई तातो पानीले सफा गर्ने वा धोएर पुनः २४ घण्टा घाममा सुकाई भाइरसमुक्त बनाउने अभ्यास पनि गरिएको छ। संक्रमणको महामारी भइहालेमा अहिले गरिएको अभ्यासले कार्यक्षेत्रमा सहज र सरल हुने सेनाले जनाएको छ।