पाँचथरको याङवरक गाउँपालिका वडा नम्बर २ फलैँचामा ३५ वर्षिय इन्द्र बहादुर कार्की मृत अवस्थामा फेला परेका छन्।
ढुंगाले हानेर हत्या गरिएको अवस्थामा शव फेला परेको वडाअध्यक्ष देउकुमार योङहाङले बताए। स्थानीयले आज बिहान मध्यपहाडी पुष्पलाल लोकमार्ग अन्तर्गत फलैँचाको तिरतिरे भन्ने सडकमा देखेर प्रहरीलाई खवर गरेका थिए।
जिल्ला प्रहरी कार्यालय पाँचथरका प्रहरी नायव उपरिक्षक सिद्धराज न्यौपानेको नेतृत्वमा प्रहरी टोली घटनास्थलमा पुगी अहिले अनुसन्धान गरिरहेको प्रहरी निरीक्षक अनिल पौड्यालले बताएका छन्।
घटनाको मुचुल्का तयार पारी अहिले शव पोष्टमार्टमको लागि जिल्ला अस्पताल पाँचथर तर्फ ल्याउने तयारी भइरहेको बताइएको छ। घटना कसले र किन गर्यो भन्ने बारे अनुसन्धान भइरहेको छ ।
