प्रदेश दुईमा स्थगित गरिएको परीक्षा आजबाट फेरी शुरु भएको छ । प्रदेश दुईमा परीक्षा हुनुभन्दा एक दिन अगावै प्रश्नपत्र आउट भएपछि एसईई परीक्षा स्थगित गरिएको थियो । स्थगित गरिएको परीक्षा आजबाट फेरी सुरु भएको हो । प्रश्नपत्र बाहिरिएपछि राष्ट्रिय परीक्षा बोर्डले रद्द र स्थगित गरेको एसईई परीक्षा अन्तर्गत आज विज्ञान विषयको परीक्षा भईरहेको छ ।
यसअघि विज्ञान र समाजिक विषयको परीक्षा पूर्व नै प्रश्नपत्र परीक्षा अगावै बाहिरिएपछि राष्ट्रिय परीक्षाबोर्डले यी दुई विषयका साथै अन्य बाँकी विषयका परीक्षाहरु समेत स्थगित गरेको थियो । नेपाल प्रहरीको केन्द्रिय अनुसन्धान ब्युरो सीआइबीले प्रश्नपत्र ‘लिक’ प्रकरणमा दुई जना प्रहरी सहित ६ जनालाई पक्राउ गरिसकेको छ ।
एसईईको फेरी शुरु भएको परीक्षा अन्तर्गत चैत २३ गते सामाजिक, २४ गते जनसङ्ख्या तथा वातावरण, २५ गते ऐच्छिक प्रथम, २६ गते ऐच्छिक द्वितिय, २७, २८ र २९ गते प्राविधिक तर्फका विषयहरुको परीक्षा हुने बोर्डले जनाएको छ ।
प्रदेश २ मा जम्मा २६३ परीक्षा केन्द्र छन् भने ७२ हजार ४९ परीक्षार्थी परीक्षामा भाग लिएको प्रदेश २ का शिक्षा निर्देशक रमाकान्त शर्माले जानकारी दिएका छन् ।
