भूकम्प गएको तीन वर्ष भयो तर घर बनाउने राहत रकम नपाउँदा रम्भा गाउँपालिका–२ फोक्सिङकोट बस्ने लक्ष्मी गाहा अझै पनि टिनको टहरामा बास बसिरहेका छन्।
२०७२ वैशाख १२ गतेको विनाशकारी भूकम्पले उनको घरमा पूर्णरूपमा क्षति भएको थियो। भूकम्प गएको दिनदेखि उनी आफ्ना चार पारिवारिक सदस्य अहिलेसम्म चारैतिर टिनले बारेको टहरामा बसोबास गरिरहेका छन्। सरकारले भूकम्प पीडितलाई घर निर्माणका लागि दिने भनिएको राहत रकम आफूले नपाएको गनको गुनासो छ ।
'भूकम्प गएको यतिका समय भयो तर घर बनाउन सकिएको छैन, स-साना बालबच्चा लिएर टिनको टहरामा रातदिन गुजारा चलाउनु परेको छ', उनले भने।
जस्तापाताको छाना, जस्तापाताकै गारो र जस्तापाताकै ढोकाको घरमा आफू दिनरात कटाउन बाध्य रहेको गाहाको दुखेसो छ।
उनले हालसम्म राहतस्वरुप खाद्यान्न सामग्री, त्रिपाल, जाडोको कपडाका लागि ३५ हजार रकम मात्र पाएका छन्।
'सरकारले घर बनाइदिने भनेर आश्वासन मात्र दियो, घर बनाउन दिने भनेको राहत रकमको पखाईमा तीन वर्ष बित्न लाग्यो, उनले गुनासो गरे।
उनले घर बनाउनका लागि सरकारबाट तीन लाख पाउन कागजपत्र सम्बन्धित निकायमा पेश गरे पनि अहिलेसम्म राहत पाउने प्रक्रिया के भइरहेको छ, पाइन्छ कि पाइँदैन यसबारेमा कुनै जानकारी नभएको बताए ।
रम्भा गाउँपालिका–२ फोक्सिङकोटमा २०७२ को भूकम्पबाट १४१ घरमा भौतिक क्षति पुगेको विवरण राहतका लागि निवेदन संकलन भएकोमा प्राविधिकको स्थलगत अध्ययनपछि ३९ घरलाई सरकारी राहत पाउने गरी वर्गीकरण गरिए पनि अधिकांश पीडितले राहत रकम अझै पनि नपाउँदा टहरामै बस्न बाध्य रहेको स्थानीयवासी एवत सारु बताउँछन्।
सरकारले पहिलो चरणमा ५० हजार, दोस्रो चरणमा एक लाख ५० हजार तथा अन्तिम चरणमा एक लाख गरी प्रत्येक भूकम्प पीडित परिवारलाई रु तीन लाखका दरले घर बनाउन सहयोग गर्ने बताए पनि यी योजना कागजमा सीमित रहेको पीडितहरू गुनासो छ।
