अवैध लागू औषध ब्राउन सुगरसहित झापाका २ जना पक्राउ परेका छन्।
महानगरीय प्रहरी परिसर, काठमाडौंले सोमबार काठमाडौंमा पत्रकार सम्मेलन गरी झापा सुरुङ्गाका २९ वर्षीय कर्णबहादुर सार्की र सोही ठाउँमा २६ वर्षीय रुद्रबहादुर सार्कीलाई २० ग्राम ब्राउन सुगरसहित काठमाडौंको माछापोखरीबाट आइतबार अपरान्ह पक्राउ गरिएको जानकारी गराएको हो।
विशेष सूचनाको आधारमा उनीहरूलाई पक्राउ गरी आवश्यक कार्वाही प्रक्रिया अघि बढाइएको परिसरका प्रमुख एसएसपी विश्वराज पोखरेलले जानकारी दिए।
उनीहरूको साथबाट नगद ७० हजारसहित विभिन्न कम्पनीका ४ थान मोबाइल, भारतीय तथा मलेसियन कम्पनीका २ थान सिम, एटिएम कार्ड २ थान र तौल गर्ने मेसिन समेत बरामद गरिएको पनि प्रहरीले जनाएको छ ।
