दाङमा भएको मोटरसाइकल दुर्घटनामा परि एकजना प्रहरी जवानको मृत्यु भएको छ भने अर्का जवान घाइते भएका छन्।
प्रहरी जवान ओविलाल गिरीको मोटरसाइकल दुर्घटनामा परि मृत्यु भएको र अर्का प्रहरी जवान बसन्त अधिकारी घाइते भएको दाङ जिल्ला प्रहरी प्रमुख एवं एसपी दुर्गा सिंहले जानकारी दिइन्।
रातिको ड्यूटीमा गएका उनीहरू सवार बा २ ब ११११ नम्बरको मोटरसाइकल घोराही उपमहानरपालिका वडा नं. ४ लक्ष्मीपुरमा दुर्घटनामा परेको प्रहरीले बताएको छ। गिरी रोल्पा जिल्लाको सुवर्णावती गाउँपालिका वडा नं. १ खुङ्ग्री निवासी हुन्।
घटनाबारे बुधबार बिहान ५ : १० बजे मात्रै प्रहरीले जानकारी पाएको थियो। गिरीको घटनास्थलमै मृत्यु भएको र अधिकारी भने राप्ती उपक्षेत्रीय अस्पताल घोराहीको उपचारपछि डिस्चार्ज भइसकेका प्रहरीले जानकारी दिएको छ।
प्रहरी जवानद्वय गिरी र अधिकारीको ड्यूटी गएराति १२ बजेदेखि बुधबार बिहान ६ बजेसम्म निर्धारण गरिएको थियो।
