पूर्वपश्चिम राजमार्ग अन्तरगत दाङको देउखुरीमा आइतबार बिहान भएको सवारी दुर्घटनामा २ जनाको मृत्यु भएको छ भने दश जना घाइते भएका छन्।
दुर्घटनामा परि राप्ती गाउँपालिका वडा नं. –५ मौरीघाट निवासी ३६ वर्षीया रामपती चौधरी र सोही गाउँपालिका वडा नं. ८ निवासी २८ वर्षीया गीता बस्यालको मृत्यु भएको वडा प्रहरी कार्यालय लमहीका प्रमुख एवं इन्सपेक्टर सुरज खड्काले जानकारी दिए । दुर्घटनामा परेका १० जना घाइतेलाई थप उपचारका लागि बुटवल लगिएको छ । घाइते हुनेमा ५ वर्षीय बालकदेखि अधिकांश महिला छन् ।
पूर्व भालुबाङबाट लमहीतर्फ आउँदै गरेको ना १ ज १३४९ नं. जीप र पश्चिमबाट पूर्वबाटतर्फ जाँदै गरेको ना ४ ख ६९५५ ट्रकले लमही १ को नर्तीमा यात्रुबहाक जीपलाई ठक्कर दिँदा उक्त दुर्घटना भएको हो ।
बिहान साढे ६ बजे उक्त दुर्घटना भएको थियो। दुर्घटनाको कारण एकिन हुन नसकेको भएपनि हुस्सुका कारण भिजिविलिटी नहुँदा दुर्घटना भएको हुन सक्ने प्रहरीको आशंका छ।
प्रहरीले ट्रकका चालकलाई नियन्त्रणमा लिएको जानकारी दिएको छ ।
