आगामी मंसिर १० र २१ गते हुने प्रतिनिधिसभा तथा प्रदेशसभा सदस्यको निर्वाचनअन्तर्गत समानुपातिक निर्वाचन प्रणालीतर्फ राजनीतिक दलले उम्मेदवारको बन्दसूची पेश गर्ने कार्य जारी छ।
कान्तिपथस्थित निर्वाचन आयोगको केन्द्रीय कार्यालयमा रहेको समानुपातिक निर्वाचन एकाइमा राष्ट्रिय यथार्थवादी पार्टी नेपालले प्रतिनिधिसभा सदस्य निर्वाचनअन्तर्गत समानुपातिक प्रणालीतर्फ ११ उम्मेदवारको बन्दसूची पेश गरेको आयोगका प्रवक्ता नवराज ढकालले जानकारी दिए।
यसका साथै, नेपाल समाजवादी पार्टी (लोहियावादी ) ले प्रदेश नं २ का लागि ४१ उम्मेदवारको बन्दसूची पेश गरेको उनले बताए । ‘शान्तिपूर्ण तवरले बन्दसूची पेश गर्ने कार्य जारी छ।’ उनले भने ‘अहिलेसम्म जम्मा २ दलले मात्र बन्दसूची पेश गरेको छ।’
आयोगका अनुसार राजनीतिक दलले प्रतिनिधिसभाको समानुपातिकतर्फ ११० तथा प्रदेशसभाको समानुपातिकतर्फ २२० पदका लागि बिहान १० देखि अपराह्न ५ बजेसम्म उम्मेदवारको बन्दसूची पेश गर्ने निर्वाचन कार्यतालिका छ ।
समानुपातिकतर्फका उम्मेदवारको बन्दसूची आज बुझाइँदै
