मंसिर २७ गतेदेखि २९ गतेसम्म हुने एघारौं महाधिवेशनका लागि नेकपा एमालेले शनिबार देशभरबाट प्रतिनिधि छनोट गरेको छ।
लुम्बिनी प्रदेशमा एमालेका ८२ हजार १ सय ३५ संगठित सदस्य छन्। तीमध्येबाट भूगोल, कमिटी र जनसंगठनबाट गरी १ सय ९० जनामध्ये १ सय ८६ जना छनोट भइसकेका छन् भने ४ जनाको लागि अहिले निर्वाचन हुँदै छ। यद्यपि सर्वसम्मत प्रतिनिधि चयन गरिएको भनिएका दाङ र बाँकेमा भने विवाद उत्पन्न भएको छ।
एमालेको केन्द्रीय संगठन विभागले जारी गरेको सर्कुलर अनुसार लुम्बिनी प्रदेशका लागि खुलाबाट ८० जना, महिला ५३, युवा २६, दलितबाट १९, मजदुरबाट ७ र प्रदेश कमिटीबाट ५ जना गरी १ सय ९० जना प्रतिनिधि तोकिएको छ।
महाधिवेशन प्रतिनिधिका लागि बिहीबार उम्मेदवारी दर्ता भएको थियो। कतिपय जिल्ला र क्षेत्रमा सर्वसम्मत रूपमा प्रतिनिधि चयन भए पनि सहमति जुट्न नसकेका जिल्ला र क्षेत्रमा निर्वाचन भएको हो।
१२ जिल्ला रहेको लुम्बिनी प्रदेशका ५ जिल्लामा सर्वसम्मत रूपमा प्रतिनिधि चयन भएका छन्। सर्वसम्मत हुन नसकेका ४ जिल्लामा निर्वाचनबाट प्रतिनिधि छनोट गरिएको छ भने रोल्पामा अहिले निर्वाचन हुँदै छ। दुई जिल्लाको प्रतिनिधि छनोट विवादित बनेको छ।
नेकपा एमाले लुम्बिनी प्रदेशका अध्यक्ष राधाकृष्ण कँडेलका अनुसार पूर्वी रूकुम, प्युठान, बर्दिया, कपिलवस्तु र गुल्मीमा सर्वसम्मत रूपमा प्रतिनिधि चयन भएका छन्। सर्वसम्मत प्रतिनिधि चयन गरिएको भनिएको दाङ र बाँकेमा विवाद निम्तिएको छ।
दाङमा निर्वाचनको प्रक्रियामै नगई विधिविपरीत एकलौटी ढंगले प्रतिनिधि चयन गरिएको भन्दै लुम्बिनी प्रदेश कमिटी सदस्य कृष्णप्रसाद भुसालले पार्टीको केन्द्रीय संगठन विभागमा उजुरी हालेका छन्।
प्रतिनिधि चयनका लागि केन्द्रीय संगठन विभागले जारी गरेको सर्कुलर विपरीत मतदाता नामावली र निर्वाचन कार्य तालिका नै प्रकाशित नगरी प्रतिनिधि छानिएको भन्दै भुसालले उजुरी हालेका हुन्।
एमाले प्रदेश अध्यक्ष कँडेलले पनि प्रतिनिधि चयनको विषयमा दाङ र बाँकेमा विवाद देखिएको बताए। ‘बाँके र दाङबाट प्रक्रियामै नगई प्रतिनिधि चयन गरिएको भनेर निवेदन आएको छ, ‘पूर्वी रुकुम, प्युठान, बर्दिया, कपिलवस्तु र गुल्मीमा भने सर्वसम्मत रूपमा प्रतिनिधि चयन भएका छन्,’ कँडेलले भने।
दाङबाट २२ जना र बाँकेबाट १५ जना प्रतिनिधि सर्वसम्मत रूपमा चयन भएको भन्दै प्रदेश र केन्द्रमा नाम पठाइसकेका छन्।
रोल्पामा भने युवा र दलित प्रतिनिधि सर्वसम्मत चयन भए पनि खुला र महिला प्रतिनिधिमा सहमति नजुटेपछि अहिले निर्वाचन हुँदै छ। रोल्पाबाट खुला २, महिला २, युवा १ र दलित १ गरी ६ जना प्रतिनिधि चयन हुने छन्।
दुई जना खुला प्रतिनिधिका लागि तीन जना र दुई जना महिलाका लागि चार जनाको उम्मेदवारी परेपछि अहिले निर्वाचनको प्रक्रिया अगाडि बढाइएको एमाले रोल्पाका अध्यक्ष अमृत बुढाले बताए।
‘शनिबार राती अबेरसम्म सर्वसम्मतको प्रयास गरिए पनि सहमति जुट्न नसकेपछि अहिले निर्वाचनको प्रक्रिया अगाडि बढाएका छौं,’ अध्यक्ष बुढाले भने। रोल्पामा एमालेका २ हजार २ सय ६४ जना संगठित सदस्यले मतदान गर्न पाउने छन्।
अध्यक्ष बुढाका अनुसार युवा प्रतिनिधिमा उनी आफै सर्वसम्मत चयन भएका छन् भने दलित प्रतिनिधिमा पहल बहादुर विक चयन भएका छन्। विक उत्पीडित जातीय मुक्ति समाजका केन्द्रीय सदस्य तथा एमाले रोल्पाका सचिवालय सदस्य हुन्।
यस्तै रूपन्देही, पश्चिम नवलपरासी, पाल्पा र अर्घाखाँचीमा भने शनिबार निर्वाचनबाट प्रतिनिधि चयन गरिएको छ। एमाले प्रदेश
अध्यक्ष कँडेलका अनुसार लुम्बिनी प्रदेशबाट सबैभन्दा बढी रूपन्देहीबाट ३४ जना प्रतिनिधि चयन भएका छन्। रूपन्देहीका क्षेत्र नं. ३ र ५ मा सर्वसम्मत रूपमा प्रतिनिधि चयन भए पनि क्षेत्र नं. १, २ र ४ मा भने निर्वाचनबाट छनोट गरिएको हो।
त्यस्तै गुल्मीबाट २०, बर्दियाबाट १५, कपिलवस्तुबाट १५, पाल्पाबाट १४, अर्घाखाँचीबाट १३, पश्चिम नवलपरासीबाट ११, प्युठानबाट ८ र पूर्वी रुकुमबाट ५ जना प्रतिनिधि चयन भएका हुन्।
एमालेको केन्द्रीय कमिटीमै सात जना पदाधिकारी रहेको लुम्बिनी प्रदेशमा प्रतिनिधि चयनको विषय पनि पेचिलो बनेको थियो। केन्द्रमा एक ठाउँ देखिने एमाले उपाध्यक्ष विष्णु पौडेल र महासचिव शंकर पोखरेलको नाममा जिल्ला तहका कार्यकर्ताहरू भने समूह बनाएरै विभाजित बन्दै आएका छन्।
केन्द्रीय कमिटी उपाध्यक्ष विष्णु पौडेल र युवराज ज्ञवाली, महासचिव शंकर पोखरेल, उपमहासचिव प्रदीप ज्ञवाली, सचिवहरू गोकर्ण विष्ट, छविलाल विश्वकर्मा र टोपबहादुर रायमाझी लुम्बिनी प्रदेशकै हुन्। नक्कली भुटानी शरणार्थी प्रकरणमा कारागारमा रहेका रायमाझी बाहेकका अन्य सबै पदाधिकारी प्रतिनिधि चयनमा प्रत्यक्ष संलग्न रहेको नदेखिए पनि अप्रत्यक्ष रूपमा भने रणनीतिक रूपमा योजना बनाएरै सक्रिय भएका थिए।
-1746009348.jpg)
