नेकपा एमाले संसद पुनर्स्थापनाको मुद्दामा क्रमशः एक्लिँदै गएको छ।
नेपाली कांग्रेसको शनिबार बसेको केन्द्रीय समिति बैठकले पनि फागुन २१ को चुनावमा जाने आधिकारिक निर्णय गरिसकेपछि एमालेलाई थप दबाब परेको छ। कांग्रेसले माघ ११ गते हुने राष्ट्रियसभा र फागुन २१ गते हुने प्रतिनिधिसभा निर्वाचनमा भाग लिने निर्णय गर्दै दुवै प्रयोजनका लागि पार्टीलाई निर्वाचन आयोगमा दर्ता गर्ने निर्णय गरेको छ।
एमाले पार्टीभित्रै पनि संसद पुनर्स्थापनाबारे मत विभाजित छ। केन्द्रीय सचिवालयको आधा पंक्ति पुनर्स्थापनामा जान नहुने धारणा राखिरहेको छ। केन्द्रीय कमिटी बैठकमा त मत विभाजन नै भयो। विघटित संसदीय दल बैठकले प्रतिनिधिसभा पुनर्स्थापना मुद्दा लिएर अदालत जाने निर्णय गरे पनि उसले रिट दर्ता गराइसकेको छैन।
यसबीच निर्वाचन आयोगले प्रतिनिधिसभा र राष्ट्रियसभा निर्वाचन प्रयोजनका लागि दल दर्ता आह्वान गरिसकेको छ। राष्ट्रियसभा सदस्य निर्वाचनका लागि आइतबारसम्म दल दर्ता गरिसक्नुपर्नेछ भने प्रतिनिधिसभा निर्वाचनका लागि मंसिर १० गतेसम्म दल दर्ता निवेदन दिइसक्नुपर्नेछ।
कानुनअनुसार पार्टीको मान्यता पाउन र चुनावमा भाग लिने प्रयोजनका लागि छुट्टाछुट्टै दल दर्ता गर्नुपर्छ। भर्खर खुलेका पार्टीले पनि निर्वाचन आयोगमा दुई पटक दर्ता गर्नुपर्छ।
नेकपा एमालेले माघ ११ गते हुने राष्ट्रिय सभा निर्वाचनका लागि दल दर्ता गरिसकेको छ। निर्वाचनको भित्री तयारी पनि थालेको छ। राष्ट्रियसभामा रिक्त हुन लागेको १९ सिटका लागि चुनाव हुँदैछ। उक्त पद फागुन २१ देखि रिक्त हुनेछ।
प्रतिनिधिसभातर्फ भने एमालेले दल दर्ता गरेको छैन। हामीले यसबारे पार्टीको केन्द्रीय निर्वाचन विभाग प्रमुख नीरज आचार्यलाई सोधेका छौं।
उनले एमालेले पनि केही दिनमै प्रतिनिधिसभा निर्वाचनका लागि दल दर्ता गर्ने बताए। कहिले दर्ता गर्न जाने भनेर पार्टी नेतृत्वसँग सल्लाह हुन बाँकी रहेको उनको भनाइ छ।
'हामी नहुने चुनावका पछाडि लाग्दैनौं। तर कानुन अनुसार निर्वाचन प्रयोजनका लागि आफ्नो संस्था अद्यावधिक राख्छौं,' उनले आइतबार सेतोपाटीसँग भने।
एमाले कानुन र विधिसम्मत चल्ने पार्टी भएकाले आफ्नो संस्थालाई अद्यावधिक र दुरूस्त राख्न केही दिनभित्रै दर्ता गर्ने उनले बताए।
त्यसो त पछिल्लो समय नेकपा एमाले नै यस्तो दल हो, जसले बाहिरबाट संसद पुनर्स्थापनाको नारा दिइरहे पनि भित्रभित्रै वडादेखि पालिका र जिल्लास्तरमा समेत दिनहुँजसो प्रदर्शन र भेला गर्दै कार्यकर्ता पंक्तिलाई उत्साहित तुल्याइरहेको छ।
एमालेले कात्तिक २२ देखि नै देशव्यापी यस्ता कार्यक्रम गर्दै आएको छ। मंसिर ५ गते शुक्रबार नेसनल भोलेन्टियर फोर्स गठन गरेको एमालेले शनिबार काठमाडौं उपत्यकाका तीनै जिल्लाका कार्यकर्तालाई मध्य सहरको भृकुटीमण्डपमा उतार्यो। भदौ २३ र २४ गतेको आन्दोलनपछि निराश र निष्क्रिय देखिएका नेता–कार्यकर्तामा यस्ता प्रदर्शन र भेलाले उत्साह थपेको पार्टीको विश्लेषण छ।
एमालेले यी प्रदर्शन गर्नुको तात्पर्य प्रतिनिधिसभा पुनर्स्थापना भने पनि भित्रभित्रै चुनावको तयारी गरिरहेको स्वयं पार्टीका कार्यकर्ता बताउँछन्।
चुनावका लागि जनपरिचालन नै मुख्य कडी हो। कार्यकर्ता पंक्ति तयार नहुँदासम्म परिणाम हासिल गर्न नसकिने बुझेकाले एमालेले शृंखलाबद्ध प्रदर्शनमार्फत् भुइँतहसम्मै 'शक्ति परीक्षण' गरेको कार्यकर्ताहरूको बुझाइ छ।
-1746009348.jpg)
