नयाँ राहदानीका लागि लामो समय कुर्नुपर्ने अवस्था अन्त्य गर्न सरकारले तीन साताभित्र आपूर्ति गराउने व्यवस्था गरेको छ।
आपूर्तिकर्ता कम्पनीसँग थप ७ लाख विद्युतीय राहदानी खरिद सम्झौता गरिएकोमा आगामी तीन साताभित्र पहिलो किस्ता आउने व्यवस्था गरिएको राहदानी विभागले जनाएको छ।
विभागले शुक्रबार विज्ञप्ति जारी गरी समयमै राहदानी उपलब्ध नहुने समस्या समाधान गर्न उक्त व्यवस्था गरेको जनाएको हो।
पहिलो किस्तापछि क्रमश: थप राहदानी आपूर्ति गरिने विभागको विज्ञप्तिमा छ।
यसअघि राहदानीको मौज्दात सकिँदै गएको र वैकल्पिक व्यवस्था गर्न नसकेका कारण दैनिक एक हजारको दरले मात्र नयाँ उपलब्ध गराइँदै आएको थियो। नवीकरण गर्नुपर्ने र नयाँ लिनुपर्ने गरी दैनिक करिब ६ हजार राहदानीको माग छ। सरकारले त्यसको एकचौथाइ पनि उपलब्ध गराउन नसक्दा सेवाग्राहीहरू समस्यामा थिए।
नयाँ राहदानीको माग हेरेर विभागले आफ्नो जनशक्तिलाई अतिरिक्त समय काममा लगाई छिटोभन्दा छिटो आपूर्ति सहज तुल्याउने व्यवस्था मिलाएको जनाएको छ।
यसबीच प्रधानमन्त्री सुशीला कार्कीले नेपालका लागि जर्मन राजदूतदेखि सम्बन्धित कम्पनीका अधिकारीहरूलाई बोलाएर नयाँ राहदानी छिटो आपूर्ति गर्न आग्रह गरेकी थिइन्।
-1746009348.jpg)
