बिहारमा भारतीय जनता पार्टी (भाजपा) र जनता दल युनाइटेडको राष्ट्रिय लोकतान्त्रिक गठबन्धन (एनडिए) का नेता चुनिएका नितिश कुमारले आज बिहीबार पटनामा मुख्यमन्त्रीको सपथ लिँदै छन्।
७४ वर्षीय नितिश कुमार दसौं पटक बिहारका मुख्यमन्त्री बन्न लागेका हुन्। पटनाको ऐतिहासिक गान्धी मैदानमा साढे ११ बजे सपथ ग्रहण समारोह आयोजना हुँदैछ।
सन् २००५ देखि अहिलेसम्म नितिश कुमारले गान्धी मैदानमै तीन पटक मुख्यमन्त्रीको सपथ लिइसकेका छन्। उनी यसपालि चौथो पटक यही स्थानबाट पदबहाली गर्दैछन्।
सपथ ग्रहण समारोहमा प्रधानमन्त्री नरेन्द्र मोदी, गृहमन्त्री अमित शाह लगायतका दर्जनौं उच्च अधिकारी सहभागी हुने कार्यक्रम छ। यसका लागि गान्धी मैदानमा कडा सुरक्षा व्यवस्था मिलाइएको छ। यहाँ २ हजार ५ सयभन्दा बढी सुरक्षाकर्मी तैनाथ हुने छन्।
एक वरिष्ठ भाजपा नेताका अनुसार, समारोहमा तीन लाखभन्दा धेरै मानिस उपस्थित हुने अनुमान गरिएको छ।
हालै सम्पन्न विधानसभा चुनावमा दुईतिहाइ बहुमत प्राप्त गरेपछि नितिश कुमारले करिब दुई दशकदेखि चलाउँदै आएको नेतृत्वलाई निरन्तरता दिन लागेका हुन्। उनले बुधबार मुख्यमन्त्री पदबाट राजीनामा दिएर गभर्नर अरिफ मोहम्मद खानलाई भेट्दै एनडिए सरकार गठनको दाबी पेस गरेका थिए।
नितिश कुमार सन् २००० मा पहिलो पटक मुख्यमन्त्री बनेका थिए। त्यति बेला उनको सरकार बहुमत जुटाउन नसक्दा सातै दिनमा ढलेको थियो।
दोस्रो र तेस्रो पटक उनले २००५ र २०१० को विधानसभा चुनावमा एनडिएको बहुमत आएपछि मुख्यमन्त्रीको सपथ लिएका थिए। तर २०१४ मा उनले भाजपा र राष्ट्रिय जनता दलसँग गठबन्धन नगरी चुनाव लडेपछि खराब नतिजा ल्याएका थिए।
त्यसपछि उनले राजीनामा दिए र पार्टीका नेता जितनराम माझीलाई मुख्यमन्त्री बनाए।
सन् २०१५ को चुनावअघि उनी फेरि मुख्यमन्त्री बने। त्यो उनको चौथो कार्यकाल थियो।
सन् २०१५ र २०२० को चुनावपछि पनि उनले मुख्यमन्त्रीको सपथ लिए, एकपटक महागठबन्धन (जेडियू–राष्ट्रिय जनता दल–कांग्रेस) को नेता बनेर र अर्को पटक एनडिएको नेता बनेर।
यसबीच २०१७ मा महागठबन्धन छाडेर एनडिएमा फर्कँदा, २०२२ मा एनडिए छाडेर राष्ट्रिय जनता दलसँग मिल्दा र २०२४ मा राष्ट्रिय जनता दल छाडेर फेरि एनडिएमा जाँदा उनले थप तीनचोटि सपथ थिए।
भारतीय अखबार 'हिन्दुस्तान टाइम्स' का अनुसार नितिशले अहिलेसम्म ७०२३ दिन (करिब १९ वर्ष) मुख्यमन्त्रीका रूपमा बिताइसकेका छन्। देशभरका सबै मुख्यमन्त्रीको सूचीमा लामो समय बिताउनेमा उनी आठौं स्थानमा पर्छन्।
उनले यस पटक पाँच वर्षे कार्यकाल पूरा गरे उनी भारतको इतिहासमा तेस्रो सबभन्दा लामो कार्यकाल बिताएका मुख्यमन्त्री बन्ने छन्।
उनीभन्दा अगाडि सिक्किमका पवनकुमार चाम्लिङ र ओडिशाका नवीन पटनायक लामो अवधि मुख्यमन्त्री बनेका थिए।
नितिशले अर्को एउटा अनौठो रेकर्ड राखेका छन्। मुख्यमन्त्री रहँदा उनले १४ जना राज्यपालसँग काम गरिसकेका छन्। यसमा उनी भारतका मुख्यमन्त्रीहरूमा तेस्रो स्थानमा परेका छन्।
यो सूचीमा मिजोरमका लाल थनहावला र हिमाञ्चल प्रदेशका वीरभद्र सिंह क्रमशः पहिलो र दोस्रो स्थानमा छन्।
-1746009348.jpg)
