आफ्नै राष्ट्रिय सुरक्षा अधिकारीहरूको विरोधका बाबजुद अमेरिकी राष्ट्रपति डोनाल्ड ट्रम्पले साउदी अरबलाई एफ–३५ लडाकू विमान बेच्ने बताएका छन्।
ट्रम्प प्रशासनका सुरक्षाविदहरूले साउदीलाई एफ–३५ लडाकू विमान बेच्दा चीनलाई त्यसमा प्रयोग भएका उन्नत प्रविधि चोर्ने अवसर हुनेछ भनेर चिन्ता व्यक्त गरिरहेका छन्।
साउदीमा शासन गरिरहेका युवराज मोहम्मद बिन सलमानको (एमबिएस) ह्वाइट हाउस भ्रमणअघि ट्रम्पले ती विमान बेच्ने बताएका हुन्।
'हामी साउदीलाई एफ–३५ बेच्नेछौं,' ट्रम्पले सोमबार पत्रकारहरूलाई भने, 'उनीहरू किन्न चाहन्छन्। उनीहरू हाम्रा राम्रा मित्र हुन्।'
मोहम्मद बिन सलमान सात वर्षभन्दा बढी समयपछि अमेरिकाको भ्रमण गर्दैछन्। उक्त भ्रमणमा सलमानले ४८ वटा लडाकू विमान र अमेरिकासँग रक्षा सम्झौताबारे छलफल गर्ने अपेक्षा गरिएको छ भनेर द न्यूयोर्क टाइम्सले लेखेको छ।
अमेरिकाले अत्याधुनिक एफ–३५ लडाकू विमान आफूसँग निकै घनिष्ठ सम्बन्ध भएका देशहरूलाई मात्र बेच्ने गरेको छ। लगभग ८ करोडदेखि ११ करोड डलरसम्म पर्ने यी विमान नेटोका सबै सदस्यलाई समेत अमेरिकाले बेच्दैन।
टाइम्सका अनुसार अहिले लगभग २० देशहरूसँग मात्रै यी विमान छन् वा किन्न अर्डर गरेका छन्।
साउदी र चीनको सुरक्षा साझेदारी छ। त्यही भएर साउदीलाई यी विमान बेच्दा चीनले यसको प्रविधि चोर्ने खतरा भएकोमा रक्षाविदहरूले चिन्ता व्यक्त गरिरहेका छन्।
सलमानले अमेरिकामा खर्बौं डलर लगानी गर्ने आश्वासन दिएकाले त्यस्तो चिन्ताका बाबजुद ट्रम्पले साउदीलाई एफ–३५ बेच्न लागेका हुन्।
(विभिन्न अन्तर्राष्ट्रिय सञ्चार माध्यमहरूको सहयोगमा तयार पारिएको)
-1746009348.jpg)
