कम्युनिष्ट तीन नेताहरूले पुरानो बाटोमा हिँडेर नयाँ गन्तव्यमा नपुग्ने बताएका छन्।
नेकपाका महासचिव नेत्रविक्रम चन्द (विप्लव), एकीकृत समाजवादीका महासचिव घनश्याम भुसाल र प्रगतिशील राष्ट्रिय अभियानका नेता जनार्दन शर्माले शुक्रबार संयुक्त प्रेस वक्तव्य जारी गर्दै पुरानो बाटोमा हिँडेर नयाँ गन्तव्यमा नपुग्ने बताएका हुन्।
'मुलुकका पुराना राजनीतिक दलहरू, खासगरी तिनका नेताहरू पुरानै संरचना र तरिका जोडजाड गरेर संकटलाई ढाकछोप गर्न र आफ्नो वर्चश्व बचाउन चाहान्छन्,' जारी वक्तव्यमा भनिएको छ, 'त्यसले मुलुकलाई अझ अन्योल, अस्थिरता र सङ्कटतर्फ धकेल्ने कुरा निश्चित छ। पुरानै बाटो हिंडेर नयाँ गन्तव्यमा पुगिन्न भन्ने कुरा स्वतः स्पष्ट छ।'
यस्तै, उनीहरूले कम्युनिष्ट, समाजवादी, प्रगतिशील तथा देशभक्तसँग संवाद, छलफल र सहकार्यको लागि आह्वान गरेका छन्।
'राष्ट्रिय निराशा र गतिरोधलाई चिर्दै प्रगतिशील तथा लोकतान्त्रिक दिशामा आम जनतालाई गोलवन्द गर्दै अगाडि बढ्नु आजको ज्वलन्त कार्यभार बनेको छ,' जारी वक्तव्यमा भनिएको छ, 'सबै प्रतिवद्ध कम्युनिष्ट, समाजवादी, प्रगतिशील तथा देशभक्तहरुसँग सार्थक संवाद, छलफल र सहकार्यको लागि आह्वान गर्दछौं।'
-1746009348.jpg)
