नेपाली कांग्रेसका प्रवक्ता प्रकाशशरण महतले पार्टी, लोकतन्त्र र देश संकटमा गुज्रिरहेकोले आन्तरिक शक्ति संघर्ष छाडेर एकजुट हुनुपर्ने बताएका छन्।
आज सानेपामा बसेको केन्द्रीय समिति बैठकमा धारणा राख्दै उनले भने, ‘अहिले देश, लोकतन्त्र, कांग्रेस पनि संकटमा छ, हामी व्यक्तिगत रूपमा पनि संकटमा छौं।’
उनले केन्द्रीय समितिकाे छलफल विशेष महाधिवेशन कि नियमित महाधिवेशन भन्नेमै सीमित भएकाे बताए। ‘राष्ट्रिय मुद्दामा छलफल नै भएन, यो दुर्भाग्यपूर्ण हो,' उनले भने।
आफूमाथि पार्टीभित्रैबाट चरित्रहत्या भएको उल्लेख गर्दै उनले 'प्रतिस्पर्धा विपक्षीसँग हुनुपर्ने हो तर हामी आफ्नैभित्र कसलाई कमजोर पार्ने, हटाउने भन्ने खेलमा लागेका छौं' भनेका छन्।
आफूलाई सामाजिक सञ्जालमा विभिन्न उपमा दिएर गाली गलाैज गर्नु गलत भाष्य भएको उनले बताए। 'टिकट जसले पनि पाउँछ, जित्ने भए टिकटकै भरमा सबै जित्थे। चुनौतीपूर्ण क्षेत्रमा मैले मैदान बनाएको हुँ,' उनले भने।
महतले कांग्रेसले अब तत्काल ३ निर्णय लिनुपर्ने बताएका छन्।
सुशासनमा शून्य सहनशीलता लागू गर्ने संकल्प, अन्तर्राष्ट्रिय सम्बन्ध सन्तुलनमा राख्ने स्पष्ट कूटनीतिक प्रतिबद्धता, देशव्यापी राष्ट्रिय संवादको नेतृत्व कांग्रेसले सुरू गर्नुपर्ने उनले बताए।
महाधिवेशन र विशेष अधिवेशनको बहसभन्दा पार्टीको ध्यान अब राष्ट्रिय निर्वाचनमा केन्द्रित हुनुपर्ने उनले बताए।
'अधिवेशन अहिले कि पछि भन्ने बहसभन्दा पहिले देशलाई चुनौतिबाट निकाल्ने नेतृत्व दिनुपर्छ,' महतले भने।
उनले क्रियाशील सदस्यता समयमै टुंग्याउन, वडा तहसम्म कार्यतालिका बनाउन र निर्वाचनपछि मात्रै पूर्ण महाधिवेशन गर्न सुझाव दिएका छन्।
'को सभापति बन्छ, को नेतृत्वमा आउँछ भन्ने बहसभन्दा माथि उठौँ,' उनले भने, 'संकटमा पार्टी फुटाउने होइन, जोड्ने हो। विवाद सहज समयमा गर्न सकिन्छ, संकटमा होइन।'
-1746009348.jpg)
