नेपाली कांग्रेसका नेता भूपेन्द्रजंग शाहीले १५ औं महाधिवेशन मंसिरभित्रै सम्पन्न गर्नुपर्ने जिम्मेबारीबाट भागेर हिँड्ने छुट कसैलाई पनि नभएको बताएका छन्।
उनले नियमित महाधिवेशन मंसिरभित्रै गरिनुपर्ने बताए।
‘अहिलेको समस्याको निकास पुरानै पारा, पुरानै तरिका, पुरानै सोच र पुरानै म्यान्डेटबाट सम्भव हुन सक्दैन,’ शाहीले भने, ‘परिवर्तनको सन्देश र अहिलेको जेनजी पुस्ताको सहभागितालाई सुनिश्चितता गर्दै नियमित महाधिवेशन मंसिरभित्र गर्नुको अर्को कुनै विकल्प छैन।’
उनले अन्यथा कुरा गरेर अलमलमा पार्न नहुने बताए।
‘१५ औं महाधिवेशन मंसिरभित्र सम्पन्न गर्नु पर्ने जिम्मेवारीबाट भागेर हिँड्ने छुट कसैलाइ छैन, नियमित महाधिवेशनको विकल्प नै नियमित महाधिवेशन हो। अरू अन्यथा कुरा गरेर अलमलमा पारेर नियमित महाधिवेशनलाई ओझेलमा पार्ने गरि विषायन्तर नगरौं,’ उनले भनेका छन्।
कांग्रेसभित्र मंसिरमै महाधिवेशन गर्नुपर्ने, नभए विशेष महाधिवेशन गर्नुपर्ने वा चुनाव सकेर वैशाखमा महाधिवेशन गर्नुपर्ने फरक फरक मागहरू छन्। आजदेखि केन्द्रीय समिति बैठक पनि बस्दैछ। उक्त बैठकमा महाधिवेशन कार्यतालिकाबारे पनि नेताहरूले धारणा राख्नेछन्।
-1746009348.jpg)
