बिहार बिधानसभा निर्वाचनको मुखैमा जनता दल युनाइटेड (जेडियू)का १६ नेता पार्टीबाट निस्कासित भएका छन्।
पार्टीविरूद्ध गतिविधि गरेको आरोपमा मुख्यमन्त्रीसमेत रहेका अध्यक्ष नितिश कुमारले १६ जनालाई पार्टीबाट निस्कासन गरेको भारतीय सञ्चारमाध्यमहरूले जनाएका छन्।
एनडिटिभीका अनुसार विधानसभाका दुई जना बहालवाला सदस्य र पूर्वमन्त्रीसहितका नेताहरूलाई जेडियूले पार्टीबाट निस्कासित गरेको हो।
उनीहरूलाई पार्टीमाथि षड्यन्त्र रचेको र पार्टीका आधिकारिक उम्मेदवारलाई हराउन लागेको आरोप लगाइएको छ। जेडियूले यसअघि पनि पूर्वमन्त्री शैलेशकुमारसहित ११ जनालाई कारबाही गर्दै पार्टीबाट निस्कासन गरेको थियो।
अहिले निस्कासित भएकाहरूमा बहालवाला विधानसभा सांसद नरेन्द्र निरज एलियस गोपाल मण्डल पनि छन्।
यसपालिको विधानसभा चुनावमा पार्टीले उम्मेदवार नबनाउने निश्चित भएपछि मण्डलले पटनास्थित मुख्यमन्त्री निवासमा धर्ना दिएका थिए। यद्यपि पार्टीले उनको स्थानमा आरजेडीबाट आएका बुलो मण्डललाई टिकट दिएको थियो। पाँचौंपटक विधानसभा सदस्य चुनाव लड्न पार्टीले नदिएपछि मण्डलले स्वतन्त्र उम्मेदवारी दिएका छन्।
जेडियूले निस्कासन गरेका अन्य नेताहरूमा विधान परिषद् सदस्य सञ्जीव श्याम सिंह, पूर्वमन्त्री हिमराज सिंह, पूर्वसांसद महेश्वरप्रसाद यादव, प्रभात किरण लगायत रहेका छन्।
पार्टीले टिकट नदिएपछि विधान परिषद् सदस्य सञ्जीव श्याम सिंह प्रशान्त किशोरको जनसुरज पार्टीबाट उम्मेदवार बनेका छन्। हिमराज सिंहले भने स्वतन्त्र उम्मेदवारी दिएका छन्।
यसरी पार्टीलाई नोक्सान पुर्याउने गरी गतिविधिमा संलग्न भएको भन्दै जेडियूले उनीहरुलाई कारबाही गरेको हो।
२४३ सदस्यीय बिहार विधानसभा निर्वाचन दुई चरणमा हुनेछ।
पहिलो चरणको मतदान नोभेम्बर ६ (कात्तिक २० गते) मा र दोस्रो चरणको मतदान नोभेम्बर ११ (कात्तिक २५) मा हुनेछ।
मतगणना नोभेम्बर १४ (कात्तिक २८) मा हुनेछ। बिहारमा ७ करोड ४२ लाख मतदाता छन्।
यो निर्वाचन दुई वटा गठबन्धनबीच भिडन्त हुनेछ।
राष्ट्रिय जनता दल (आरजेडी) नेतृत्वको 'महागठबन्धन'मा कंग्रेस, भारतीय कम्युनिस्ट पार्टी, कम्युनिस्ट पार्टी अफ इन्डिया (मार्क्सवादी), कम्युनिस्ट पार्टी अफ इन्डिया (माले) र विकासशील इन्सान पार्टी सामेल छन्।
यो महागठबन्धनले तेजस्वी यादवलाई मुख्यमन्त्री घोषणा गरेको छ। ३५ वर्षीय यादव बिहारका बहुचर्चित नेता लालुप्रसाद यादवका कान्छा छोरा हुन्। पछिल्लो समय उनी बिहारको प्रतिपक्षी दल आरजेडीका नेता हुन्।
भारतीय जनता पार्टी (भाजपा) नेतृत्वको 'एनडिए' गठबन्धनले जनता दल (युनाइटेड) का नितिश कुमारलाई आफ्नो तर्फबाट भावी मुख्यमन्त्री घोषणा गरेको छ।
नितिश कुमार दसौंपटक मुख्यमन्त्री बन्ने दौडमा छन्।
उनी पछिल्लो पटक महागठबन्धन त्यागेर भाजपाकै समर्थनमा नवौं पटक मुख्यमन्त्री बनेका थिए।
पटक पटक गठबन्धन फेरिरहने भएकाले उनलाई विपक्षीहरू 'पल्टुराम' भन्छन्।
-copy-1761394385.jpg)
-1756446574.jpg)
-1746009348.jpg)
