प्रधानमन्त्री सुशीला कार्की र जेनजी प्रतिनिधिहरूबीच शनिबार झन्डै दुई घन्टा छलफल भयो।
शीतल निवासमा राष्ट्रपति रामचन्द्र पौडेलसहित प्रधानमन्त्री कार्की र जेनजी प्रतिनिधिहरूबीच छलफल हुने तय थियो।
तर शनिबार नै राष्ट्रपति पौडैल अस्वस्थ भएपछि उनी त्रिवि शिक्षण अस्पताल भर्ना भए। छलफलमा सहभागी भएनन्। अहिले उनको स्वास्थ्य अवस्था सामान्य रहेको अस्पतालले जनाएको छ।
राष्ट्रपति नै सहभागी हुन नसकेपछि प्रधानमन्त्री कार्कीले जेनजी प्रतिनिधिहरूसँग छलफल गरेकी थिइन्। जेनजीबाट सुदन गुरूङ, ओजस्वीराज थापा, मिराज ढुंगाना, प्रवेश दाहाल, जितेन्द्र शाह, प्रशान्त पौडेल, अंकित अधिकारी, अभिषेक श्रेष्ठ, जुनल गदाल, अर्जुन शाही, रक्षा बम, प्रदीप ज्ञवाली, युजन राजभण्डारी, आदित्य कर्ण, आकृति घिमिरे, मोनिका निरौला, ओजस्वी भट्टराई, रिजन राना मगर, निकुञ्ज भण्डारी सहभागी थिए।
सरकार तर्फबाट कुलमान घिसिङबाहेक सबै मन्त्री सहभागी थिए।
राष्ट्रपति अनुपस्थित भएपछि बैठक एजेन्डामै प्रवेश नभएको एक जेनजी प्रतिनिधिले बताए।
'निर्वाचनको विषयमा छलफल हुने भन्ने एजेन्डा थियो। राष्ट्रपतिज्यू उपस्थित हुन सक्नुभएन। त्यसपछि प्रधानमन्त्रीज्यूले तपाईंहरूको कुरा के छ भन्नुभयो,' ती प्रतिनिधिले सेतोपाटीसँग भने।
त्यसपछि जेनजी प्रतिनिधिहरूले पालैपालो आफ्नो भनाइ राखेका थिए।
उनीहरूले आन्दोलनलाई संस्थागत गर्नका लागि लिखित समझदारीमा हस्ताक्षर गर्नुपर्ने कुरादेखि सहिद र घाइतेका परिवारलाई विशेष प्राथमिकता दिनुपर्ने र उनीहरूलाई सरकारमा पनि समेट्नुपर्ने माग राखे।
'त्यसपछि प्रधानमन्त्री कार्कीले हुन्छ तपाईंहरूको कुरा राम्ररी बुझेको छु भन्नुभयो र त्यो काम छिट्टै हुन्छ पनि भन्नुभयो,' प्रधानमन्त्री कार्कीको भनाइ उद्धृत गर्दै ती प्रतिनिधिले भने।
प्रतिनिधिहरूले मन्त्री बन्ने चर्चामा रहेकाहरूबारे पनि प्रधानमन्त्री कार्कीलाई प्रश्न गरेका थिए।
जबाफमा प्रधानमन्त्री कार्कीले त्यसमा सत्यता नभएको बताइन्। मन्त्रिपरिषद् विस्तारका लागि जेनजीसँगै सम्भावित व्यक्तिहरूको नाम मागिरहेको प्रधानमन्त्री कार्कीले बताएकी थिइन्।
'मन्त्रीका लागि नाम मागेको छु, आएको छैन। बाहिर चर्चा चलेका व्यक्तिहरूलाई मन्त्री बनाउन लागिएको होइन। त्यसको बारेमा सल्लाह गरेर नियुक्तिमा जान्छु,' प्रधानमन्त्री कार्कीले छलफलमा भनिन्।
केही प्रतिनिधिले संविधानको विषयमा पनि प्रश्न उठाएका थिए।
'केहीले यही संविधान मानेर जाने हो कि होइन भन्ने प्रश्न उठाउनुभएको थियो। प्रधानमन्त्री ज्यूले त्यसमा जबाफ दिनुभएन,' ती प्रतिनिधिले भने।
जेनजी प्रतिनिधिहरूले भ्रष्टाचार नियन्त्रणका विषयमा पनि प्रश्न उठाएका थिए।
त्यसमा प्रधानमन्त्री कार्कीले भ्रष्टाचार नियन्त्रणका लागि सरकारले काम गरिरहेको बताइन्।
'काम हुँदैछ। एकैदिनमा हुने होइन। जादुको छडी होइन। विस्तारै काम देखिइरहेको छ देखिँदै जान्छ पनि,' प्रधानमन्त्री कार्कीले भनेकी थिइन्।
बैठकमा केहीबेर माहोल चर्काचर्की समेत बनेको तीन जना प्रतिनिधिले सेतोपाटीसँग बताएका छन्। दुई जना प्रतिनिधिहरूले नाम नखुलाउने सर्तमा त्यहाँ भएको चर्काचर्कीबारे बताए।
बैठकको बीचमा एक प्रतिनिधिले प्रधानमन्त्री कार्कीलाई 'सरकार एनजिओको हो?' भनेर सोधेका थिए।
'सरकार एनजिओको हो? सरकारका सबै मन्त्री एनजिओका हुन् भनेपछि चर्काचर्की पनि भयो,' दुई जना प्रतिनिधिले भने।
त्यसपछि प्रधानमन्त्री कार्की झोक्किएकी थिइन्।
'के-को एनजिओ? को एनजिओ? कोही छ एनजिओमा काम गरेको? यस्तो कुरा चाहिँ नगर्नुस् । मैले आजसम्म कुन एनजिओमा काम गरेको छु? यहाँ भएका कसैले काम गरेका छन्। नचाहिने कुरामा जसले जे भन्यो पत्याउनेमा तपाईंहरू नजानुस्,' प्रधानमन्त्री कार्कीको भनाइ उद्धृत गरेर ती प्रतिनिधिहरूले सेतोपाटीसँग भने।
जेनजी मुभमेन्ट अलायन्सकी प्रतिनिधि मोनिकाले पनि बैठकमा केही हल्ला भएको बताइन्।
'बीचमा हल्लाखल्ला भयो। सबै कुरा त मलाई पनि थाहा भएन, हल्लाखल्ला चाहिँ भयो,' उनले भनिन्।
उनका अनुसार शनिबारको छलफलमा सरकारबाट भएका कामहरूबारे प्रधानमन्त्री कार्की र अरू मन्त्रीहरूले जेनजी प्रतिनिधिहरूलाई जानकारी गराएका थिए।
शिक्षामन्त्री महावीर पुनले घाइतेका कुरूवाहरूलाई आर्थिक सहायता गरेकोदेखि शिक्षाको विषयमा सरकारले गरिरहेको कामकारबाहीबारे जानकारी गराएका थिए।
'परिपुरणको विषयमा अझै काम गर्न आवश्यक छ भनेर सहिद र घाइते परिवारबाट पनि आएको थियो। प्रधानमन्त्री र मन्त्रीहरूले अझै गर्छौं भन्ने प्रतिबद्धता जनाउनुभएको छ। सुशासनका कामहरू पनि द्रूत गतिमा भइरहेका छन् पनि भन्नुभयो,' उनले भनिन्।
जेनजी मुभमेन्ट अलायन्सले समावेशीताको कुरा पनि उठाएको उनले बताइन्।
'बैठकहरू लगायत वार्ता टोलीहरू जे बन्छन् समावेशी हुनुपर्यो भन्ने विषय राख्यौं,' उनले भनिन्।
बैठकबाट बाहिरिएपछि पत्रकारहरूसँग कुराकानी गर्दै जेनजी प्रतिनिधि मिराज ढुंगानाले निर्वाचनको विषयमा छलफल गर्न बोलाइएको बताए।
यद्यपि राष्ट्रपति अस्वस्थ हुँदा त्यस विषयमा छलफल प्रवेश नभएको उनले बताए।
-1746009348.jpg)
