नेपाली कांग्रेसको पदाधिकारी बैठक आज दिउँसो बस्ने भएको छ।
ललितपुरको एक होटलमा बिहीबार दिउँसो १ बजेका लागि पदाधिकारी बैठक बोलाइएको हो।
बैठकमा सभापति शेरबहादुर देउवा सहभागी हुने वा नहुने यकिन भइसकेको छैन।
प्रवक्ता प्रकाशशरण महतले पदाधिकारी बैठक बस्ने तर सभापति देउवा उपस्थित हुने वा नहुने भन्ने यकिन भइनसकेको बताए।
‘सभापतिज्यू आज पदाधिकारी बैठकमा नजाने भन्ने सुनेको छु, के गर्नुहुन्छ, म अहिले भेट्न जाँदैछु, आज जानुभएन भने पनि असोज २६ को केन्द्रीय समिति बैठकमा उहाँ उपस्थित हुनु हुनेछ,’ प्रवक्ता महतले सेतोपाटीसँग भने।
सभापति देउवा जेनजी आन्दोलनका क्रममा भदौ २४ गते निवास बूढानीलकण्ठमा प्रदर्शनकारीहरूबाट आक्रमणमा परेका थिए भने त्यसयता ३० दिनदेखि सार्वजनिक रूपमा देखिएका छैनन्।
जेनजी आन्दोलनका क्रममा देउवा निवास बूढानीलकण्ठ पनि आगजनी भएको थियो। सभापति देउवा दम्पती काठमाडौंमा घर भाडामा लिएर बस्दै आएका छन्।
सभापति देउवाले निवासमै आफूनिकट केही पदाधिकारीहरूसँग भेटेर कुराकानी गर्दै आएका छन्। जेनजी पुस्ताको आन्दोलनपछि महामन्त्रीद्वय गगन थापा र विश्वप्रकाश शर्मासँग भने सभापति देउवाको भौतिक रूपमा भेटवार्ता भएको छैन।
समसायमिक राजनीतिक घटनाक्रम, २६ असोजमा बस्ने केन्द्रीय समितिका सम्भावित एजेन्डालगायत विषयमा छलफल गर्न आज पदाधिकारी बैठक बस्न लागेको प्रवक्ता महतको भनाइ छ।
सभापति देउवा पदाधिकारी बैठकमा अनुपस्थित रहे उपसभापति पूर्णबहादुर खड्काले बैठकको अध्यक्षता गर्नेछन्। यसअघि पनि उपसभापति खड्काको संयोजकत्वमा पटक पटक केन्द्रीय कार्यसमिति बैठक बसिसकेको छ।
पदाधिकारी बैठकमा पनि महामन्त्रीद्वय गगन थापा र विश्वप्रकाश शर्माले मंसिरमै नियमित महाधिवेशन गर्ने प्रस्ताव लैजाने तयारी गरेका छन्।
यसअघि केन्द्रीय कार्यसम्पादन समिति बैठकमा पनि महामन्त्रीद्वय थापा र शर्माले नियमित महाधिवेशन गर्नुपर्ने नभए विशेष महाधिवेशनमा जानुपर्ने प्रस्ताव राखेका थिए।
विशेष महाधिवेशनमा जान सभापति देउवानिकट नेताहरू तयार देखिएका छैनन्।
तर महामन्त्री थापा र शर्मानिकट तथा नेता शेखर कोइरालानिकट केहीले विशेष महाधिवेशन माग गर्न महाधिवेशन प्रतिनिधिहरूको हस्ताक्षर संकलन गरिरहेका छन्।
नेता शेखरनिकट सबै महाधिवेशन प्रतिनिधिहरूको साथ नपाइएको गुनासो पनि महामन्त्री थापा र शर्मानिकट महाधिवेशन प्रतिनिधिहरूको भनाइ छ।
२०७८ मंसिरमा भएको १४ औं महाधिवेशनबाट देउवा दोस्रो पटक कांग्रेस सभापति भएका थिए। उनको नियमित कार्यकाल मंसिरमा सकिँदैछ त्यसैले नियमित महाधिवेशनमा महामन्त्रीद्वय थापा र शर्माले जोड दिएका छन्।
नियमित महाधिवेशन गर्न क्रियाशील सदस्य टुंगो लगाउनुपर्ने हुन्छ। त्यसका लागि अहिलेसम्म क्रियाशील नवीकरणको अवस्थाबारे बुधबार सानेपामा क्रियाशील सदस्यता व्यवस्थापन समिति बैठक बसेको थियो।
क्रियाशील नवीकरण र छोटो समय दिएर नयाँ क्रियाशील बाँड्ने तथा मंसिरमै नियमित महाधिवेशनमा जान सकिने महामन्त्रीद्वय थापा र शर्मा छन्।
तर नियमित महाधिवेशन नगर्ने र सभापति देउवा नेतृत्वको कार्यसमितिको म्याद एक वर्ष थप गर्ने गरी संस्थापन पक्ष अघि बढेमा विशेष महाधिवेशनका लागि ४० प्रतिशत महाधिवेशन प्रतिनिधिहरूको हस्ताक्षर पेस गर्ने तयारीसमेत कांग्रेसमा भइरहेको छ।
-ink-1758264238-1758281814.jpeg)
-1746009348.jpg)
