मधेसमा नयाँ सरकार गठनका लागि रस्साकस्सी सुरू भएको छ।
जेनजी आन्दोलनबाट ६ वटा प्रदेशमा कुनै असर नपरे पनि मधेस प्रदेशमा सरकार परिवर्तन हुन लागेको हो।
जनमतबाट मुख्यमन्त्री बनेका सतिशकुमार सिंहले भदौ २४ गते जेनजी आन्दोलनलाई समर्थन जनाउँदै राजीनामा गर्ने संकेत गरेका थिए। तर पछि पार्टीको निर्देशनको समेत अवज्ञा गर्दै उनले राजीनामा नदिने, सदन 'फेस' गर्ने प्रतिक्रिया दिएका थिए।
भदौ ३१ गते जनमतले मुख्यमन्त्री सहित मन्त्रीलाई फिर्ता बोलाउँदै सरकारलाई दिएको समर्थन फिर्ता लिएको पत्र सभामुख रामचन्द्र मण्डललाई बुझाएको थियो।
जनमतपछि, एक साताअघि नेपाली कांग्रेसले पनि सिंह नेतृत्वको सरकारलाई दिएको समर्थन फिर्ता लिएर नयाँ सरकार गठनका लागि छलफल अघि बढाएको थियो।
बुधबार नेकपा एमालेले समर्थन फिर्ता लिएको जानकारी प्रदेश प्रमुखको कार्यालयलाई इमेलमार्फत गराएको थियो।
अहिले फेरि यी तीनवटै दल मिलेर नयाँ सरकार बनाउन दाबी पेस गरेका हुन्।
नेपाली कांग्रेसका संसदीय दलका नेता कृष्णप्रसाद यादवलाई मुख्यमन्त्री बनाउने गरी दाबी पेस गरिएको छ।
प्रदेश प्रमुख कार्यालयमा संविधानको धारा १६८ को उपधारा (२) बमोजिम नयाँ सरकार गठनका लागि दाबी पेस गरिएको छ।
एमालेका २३, कांग्रेसका २२ र जनमतका १३ गरी ५८ जना प्रदेशसभा सदस्यको समर्थनमा नयाँ सरकार गठनका लागि दाबी पेस गरिएको हो।
१०७ सदस्यीय प्रदेशसभामा सरकार बनाउन ५४ जना प्रदेशसभा सदस्यको समर्थन आवश्यक पर्छ।
एमालेबाट प्रदेशसभामा २५ जना सदस्य निर्वाचित भएका भए पनि रामचन्द्र मण्डल सभामुख बनेका र दिपेन्द्रकुमार ठाकुर निलम्बनमा छन्।
-1746009348.jpg)
