अफ्रिकी मुलुक माडागास्करमा युवाहरूले आन्दोलन गर्दा राष्ट्रपति एन्ड्री रजोएलिनाले सरकार विघटन गर्ने घोषणा गरेका छन्।
पानी र बिजुली कटौतीविरूद्ध युवाहरूले त्यहाँ तीन दिनदेखि आन्दोलन गर्दै आएका छन्। यस आन्दोलनको क्रममा २२ जनाको मृत्यु र एक सय जना भन्दा बढी घाइते भएको संयुक्त राष्ट्रसंघले जनाएको छ।
रोयटर्सका अनुसार केन्या र नेपालमा भएको जेनजी पुस्ताको आन्दोलनबाट प्रेरित भएको हो। पछिल्ला वर्षमा देखिएको यो आन्दोलन सबैभन्दा ठूलो मानिएको छ।
‘यदि सरकारका सदस्यहरूले आफ्ना तोकिएका जिम्मेवारी पूरा गर्न सकेका छैनन् भने हामी त्यसलाई स्वीकार्छौं र माफी माग्छौं,’ राष्ट्रपति रजोएलिनाले राष्ट्रिय प्रसारक टेलिभिजन माडागास्करमार्फत दिएको सम्बोधनमा भनेका छन्।
राष्ट्रपतिले युवाहरूसँग संवादको लागि ठाउँ बनाउन चाहेको बताउँदै, लुटपाटबाट प्रभावित व्यवसायहरूलाई सहयोग गर्ने उपायहरू अपनाउने वाचा गरे।
‘म क्रोध, पीडा र विद्युत् कटौती तथा पानी आपूर्तिका समस्याले ल्याएको कठिनाइलाई बुझ्छु। मैले आवाज सुनेँ, पीडा महसुस गरें, र दैनिक जीवनमा परेको प्रभावलाई बुझें,’ उनले भने।
राष्ट्रसंघले प्रस्तुत गरेको विवरणलाई त्यहाँको परराष्ट्र मन्त्रालयले अस्वीकार गरेको छ। राष्ट्रसंघले प्रस्तुत गरेको विवरण अफवाह र भ्रमका आधारमा निकालिएको मन्त्रालयको भनाइ छ।
प्रदर्शन सुरूमा राजधानी आन्तानानारिभोमा भएको थियो। पछि आठ वटा सहरमा फैलिएको थियो।
सोमबार राजधानीको विश्विवद्यालय अगाडि प्रदर्शन भएको थियो। प्लाकार्ड बोकेर आएका युवाहरूले राष्ट्रिय गान गर्दै सहरमा मार्च गरका थिए।
पछि प्रहरीले अश्रुग्यास प्रहार गरेको थियो। कर्फ्यू आदेश समेत जारी गरी स्थितिलाई नियन्त्रणमा लिन रबरको बुलेट समेत प्रहार गरिएको थियो।
त्यहाँका सुपरमार्केट, इलेक्ट्रोनिक्स पसल तथा बैंकहरूमा लुटपाट भएका छन्। यस्तै केही नेताहरूको घरमा समेत आक्रमण भएको छ।
रजोएलिना पहिलो पटक २००९ को ‘कू’ मार्फत सत्तामा आएका थिए।
उनले २०१४ मा पदत्याग गरे तर २०१८ को निर्वाचनमा विजयी हुँदै पुनः राष्ट्रपति बने। त्यसपछि उनले २०२३ डिसेम्बरमा भएको निर्वाचनमा तेस्रो कार्यकाल सुनिश्चित गरे, यद्यपि उनका प्रतिद्वन्द्वीहरूले सो निर्वाचनमा अनियमितता भएको दाबी गरेका थिए।
-1746009348.jpg)
