कार्यवाहक प्रमुख निर्वाचन आयुक्त रामप्रसाद भण्डारीले १६ वर्षको उमेरमा मतदाता नामावली दर्ता गरिए पनि भोट हाल्न भने १८ वर्ष उमेर पुग्नुपर्ने बताएका छन्।
निर्वाचन आयोगले जारी गरेको विज्ञप्तिको भाषाले कतै १६ वर्षकै उमेरमा मतदानको अधिकार दिन लागिएको हो कि भन्ने आशंका पैदा गरेको थियो।
‘मतदाता नामावलीमा नाम दर्ता हुन बाँकी रहेका १६ वर्ष उमेर पूरा भई नेपाली नागरिकताको प्रमाणपत्र प्राप्त नेपाली नागरिकलाई नाम दर्ता एवं विवरण अद्यावधिक गरी मिति २०८२ फागुन २१ गते हुने प्रतिनिधि सभा सदस्य निर्वाचनमा आफ्नो नागरिक अधिकार प्रयोग गर्न निर्वाचन आयोग हार्दिक अनुरोध गर्दछ’, आयोगको विज्ञप्तिमा उल्लेख थियो।
विज्ञप्तिले आशंका पैदा गरपछि आयोगले विज्ञप्ति सच्याउने भएको हो।
‘भोट हाल्न उमेर १८ वर्ष पुग्नुपर्छ,’ भण्डारीले भने, ‘नागरिक अधिकार प्रयोग गर्ने संविधान अनुसार १८ वर्षमा हो। विज्ञप्ति करेक्सन हुन्छ।’
प्रतिनिधि सभामा कति वर्ष उमेर पुगेका नेपालीले मत हाल्न पाउने भन्ने नेपालको संविधानमै स्पष्ट व्यवस्था छ।
संविधानको धारा ८४ (५) मा भनिएको छ — १८ वर्ष उमेर पूरा भएको प्रत्येक नेपाली नागरिकलाई संघीय कानुन बमोजिम कुनै एक निर्वाचन क्षेत्रमा मतदान गर्ने अधिकार हुनेछ।
यसको अर्थ, संविधान अनुसार मतदान गर्न उनीहरू १८ वर्ष पुगेको हुनुपर्छ। संविधान सभाले संविधान बनाउँदा १६ वर्षमा मत दिन पाउने कि १८ वर्षमा भन्ने लामो छलफल भएको थियो। धेरै छलफलपछि अन्तिममा १८ वर्ष कायम भएको हो।
त्यसैले आउने चुनावमा १६ वर्ष मात्र पुगेका जेन–जी पुस्ताले मतदान गर्न पाउने छैनन्। उनीहरूको नाम मतदाता नामावलीमा हुनुपर्छ र फागुन २० गते, अर्थात् निर्वाचन हुने एक दिनअघि १८ वर्ष पुगेको हुनुपर्छ।
-1746009348.jpg)
