नेकपा (माओवादी) केन्द्रका उपमहासचिव जनार्दन शर्माले अध्यक्ष पुष्पकमल दाहाल ‘प्रचण्ड’ सहित सबै पदाधिकारीले राजीनामा दिएर महाधिवेशनमा जानुपर्ने प्रस्ताव गरेका छन्।
आइतबारको पदाधिकारी बैठकमा उनले वरिष्ठ नेताको संयोजकत्वमा महाधिवेशन आयोजक समिति बनाएर जानुपर्ने प्रस्ताव गरेका हुन्।
आइतबारकै बैठकमा अध्यक्ष प्रचण्डले पार्टीका कमिटीहरू भंग गर्दै महाधिवेशन आयोजक समिति बनाउने प्रस्ताव गरेका थिए। यो प्रस्ताव अब असोज ९ गते बस्ने केन्द्रीय समितिले अनुमोदन गर्नेछ। प्रचण्डले आगामी मंसिरमा विशेष महाधिवेशन पनि प्रस्ताव गरेका छन्।
‘पार्टी पुनर्गठनको प्रक्रियालाई अगाडि बढाउन यस बैठकबाट अध्यक्षलगायत हामी सबै पदाधिकारीहरूले आफ्नो पदबाट राजीनामा गर्नुपर्दछ। महाधिवेशनसम्म पार्टीलाई संयोजन गर्ने गरी वरिष्ठ नेतालाई कार्यभार दिऊँ,’ शर्माले प्रस्ताव गर्दै भनेका छन्।
उनले आफूले विगतदेखि नै पार्टी पुनर्गठनबारे प्रस्ताव गरेको स्मरण गरेका छन्।
‘पार्टी पुनर्गठनको अनिवार्यता महसुस गरी विगत केही समयदेखि मैले स्वविवेकले उठाएका विषयलाई विभिन्न ढंगले आरोपित गर्ने प्रयत्न गरियो। सायद ती विषयलाई सोही समयमा आत्मसात् गरेको भए आज हाम्रो पार्टीको अवस्था यस्तो हुने थिएन,’ उनले भनेका छन्।
पार्टी पुनर्गठनका लागि माओवादी केन्द्रले यतिबेला विचार, राजनीति, संरचना आदि समग्र क्षेत्र नयाँ ढंगले बदल्नुपर्ने खाँचो औंल्याएका छन्।
यसो गरिरहँदा विगतमा माअोवादीले गरेको त्याग, बलिदान, अध्यक्ष प्रचण्डको नेतृत्वमा भएको ‘जनयुद्ध’, जनआन्दोलन र संविधान सभामार्फत् संघीय लोकतान्त्रिक गणतन्त्र नेपालको संविधान घोषणा गरेर जनतालाई अधिकार सम्पन्न गर्ने जस्ता कार्यको अवमूल्यन गर्न नहुने उनको भनाइ छ।
‘नेतृत्वले खेलेको भूमिका र गौरवको रक्षा नगरी आदोलनको रक्षा हुँदैन,’ उनले बताएका छन्, ‘नेतृत्व हस्तान्तरणबारे विगतमा हामीले माग गरेकै हो। आज आन्दोलनले ती कुराहरूलाई अझ सही साबित गरेको छ। अब यथास्थितिमा पार्टी अगाडि बढ्न नैतिक मनोवैज्ञानिक विधिगत र राजनीतिक लाइनका दृष्टिले पनि नसक्ने अवस्थालाई आत्मसात् गर्नुपर्दछ,’ उनले भनेका छन्।
त्यस्तै उनले महाधिवेशनमा युवाहरूको प्रतिनिधित्व र नेतृत्व समेत सुनिश्चित गर्न अहिले नै अध्यक्षसहित सबै पदाधिकारी राजनीतिक र वैचारिक काम गर्नेगरी निर्देशक कमिटी विधानमा व्यवस्था गरी अगाडि बढ्नुपर्ने बताएका छन्।
यसबाट अध्यक्ष प्रचण्डले विगतमा खेलेको भूमिकासहित पार्टीको पूरक भूमिका समेतको सम्मान र वर्तमानको आवश्यकता माग पूरा हुने उनको ठम्याइ छ। साथै यसले समस्या समाधानको बाटो खोल्ने पनि उनले बताएका छन्।
‘गत केन्द्रीय कमिटीले गरेको निर्णय बमोजिम मंसिर महिनाभित्र महाधिवेशन सम्पन्न गरी पार्टीलाई नयाँ पुस्तामा पुर्याउने र अध्यक्ष प्रचण्डसहित हाम्रो पंक्तिले महाधिवेशनबाट निर्वाचित हुने कार्यकारी कमिटीलाई राजनीतिक–वैचारिक सहयोग गर्ने प्रतिबद्धता र आत्मसातीकरण जरूरी छ,’ उनले भनेका छन्।
त्यस्तै उनले पार्टीभित्र र सरकार एवं जनप्रतिनिधिका रूपमा एउटा व्यक्ति कति पटक कुन पदमा रहन पाउने र कति समय रहने भन्ने विषयमा स्पष्ट नीति निर्माण गर्नुपर्ने खाँचो औंल्याएका छन्।
हरेक तहमा नेतृत्व निर्माण प्रत्यक्ष निर्वाचित प्रणालीमार्फत् गरिनुपर्ने उनको भनाइ छ।
‘पार्टी पुनर्गठनका लागि हाम्रो समाजको वर्गीय अवस्था, विविधता, राजनीतिक चेतना, जेन–जी पुस्ताको माग र उनीहरूको सपनालाई मध्यनजर गरेर आजको आवश्यकता र चुनौतीहरूको सामना गर्न विचार राजनीति संरचना र विधिहरूलाई नितान्त नयाँ ठाउँमा उठाउन जरूरी छ। यसका लागि महाधिवेशनबाट निष्कर्ष निकाल्नेछौं,’ उनले भनेका छन्।
-1746009348.jpg)
