राष्ट्रिय स्वतन्त्र पार्टीले जेन जी आन्दोलनपछिको संवेदनशील अवस्थालाई ध्यानमा राख्दै समाज थप विभाजित नहोस् भन्ने ध्येयले सद्भाव तथा सहकार्य अभियान सुरू गर्ने भएको छ।
पार्टी केन्द्रीय कार्यालय च:मतिमा बिहीबार बसेको सचिवालय बैठकले असहमतिलाई बैमनस्यता बाट होइन, संवाद र सहिष्णुताबाट समाधान गर्न अभियान चलाउने निष्कर्ष निकालेको प्रवक्ता मनिष झाले बताए।
‘भदौ २३ गते जेन–जी पुस्ताले नेतृत्व गरेको शान्तिपूर्ण प्रदर्शनप्रति राष्ट्रिय स्वतन्त्र पार्टीको विभिन्न तहबाट नैतिक ऐक्यबद्धता रहेको कुरामा दुई मत छैन। तथापि, विध्वंस, लुटपाट र तोडफोड रास्वपाको राजनीतिक संस्कृति होइन भन्ने कुरा पनि पार्टी स्पष्ट पार्दछ। जेन जी आन्दोलनपछिको संवेदनशील अवस्थालाई लिएर समाज थप विभाजित नहोस् भन्ने उद्देश्यले पार्टीले सद्भाव तथा सहकार्य अभियान प्रारम्भ गर्नेछ। असहमतिलाई बैमनस्यता बाट होइन, संवाद र सहिष्णुताबाट समाधान गर्ने पार्टीको दृढ प्रतिवद्धता फेरि पनि जाहेर गर्दछौं,’ झाले भने।
त्यस्तै पार्टीले स्थापनाकालदेखि नै उठाउँदै आएको विशेष एजेन्डा र बाचापत्रको प्रमुख मुद्दा विदेशमा रहेका नेपाली नागरिकलाई मतदान गर्ने अधिकार प्रति वर्तमान सरकारले देखाएको चासोलाई रास्वपाले स्वागत गरेको उनले बताए।
पार्टी आफैले उठाएको मुद्दा र यस प्रक्रियाको ब्लुप्रिन्ट पार्टीसँग भएका कारणले प्रवासी नेपालीको मताधिकारबारे रास्वपा अन्तरिम सरकारलाई आवश्यक सहयोग गर्न प्रतिबद्ध रहेको पनि झाको भनाइ छ।
‘प्रवासमा रहेका नेपाली नागरिकहरूको मतदाता नामावली दर्ता प्रक्रिया पूर्णरूपमा अनलाइनबाट गर्ने व्यवस्था मिलाउन, नेपालका विदेशस्थित दूतावास÷कन्सुलेट तथा नेपालका अन्तर्राष्ट्रिय विमानस्थलहरूका आगमन र प्रस्थान दुवै क्षेत्रबाट बायोमेट्रिक सेवा उपलब्ध गराउने व्यवस्था गर्न सम्बन्धित निकायलाई प्रस्ताव गर्दछ। जेन जी पुस्ताका धेरै नागरिकहरू मतदाता नामावलीमा सूचीकृत नभएको अवस्थालाई ध्यानमा राख्दै, मतदाता नामावली दर्ताको लागि राष्ट्रिय र अन्तर्राष्ट्रिय रूपमा अभियान सञ्चालन गर्ने निर्णय गरिएको छ,’ उनले भने।
-1758107792.jpg)
-1746513231.jpg)
-1746009348.jpg)
