नेपाली कांग्रेसले भदौ २३ र २४ गते जेनजी पुस्ताले गरेको आन्दोलनका क्रममा सहभागी भई आगजनी र तोडफोड गर्ने कार्यमा संलग्न रहेका कार्यकर्ताहरूमाथि कारबाही गर्ने भएको छ।
महामन्त्रीद्वय गगन थापा र विश्वप्रकाश शर्माले बुधबार प्रदेश तथा जिल्ला कार्यसमितिहरूलाई सर्कुलर गरी जेनजी आन्दोलनका क्रममा आगजनी र तोडफोडमा संलग्न रहने कार्यकर्ताहरूको विवरण मागेका हुन्।
‘जेनजी आन्दोलनका क्रममा काठमाडौं र बाहिर आगजनी र तोडफोडमा कतै कांग्रेस कार्यकर्ताहरू संलग्न त छैनन्? संलग्न छन् भने फोटोलगायत विवरण र नाम तत्काल केन्द्रीय कार्यालयमा पठाउनू,’ महामन्त्रीद्वय थापा र शर्माले पठाएको सर्कुलरमा उल्लेख छ।
जेनजी पुस्ताले भ्रष्टाचार र सामाजिक सञ्जाल बन्दविरूद्ध भदौ २३ र २४ गते देशैभर प्रदर्शन गरेका थिए। भदौ २३ गते काठमाडौंमा मात्रै १७ जनाको मृत्यु भएपछि भोलिपल्ट आन्दोलनले उग्र रूप लिएको थियो।
सिंहदरबारस्थित विभिन्न मन्त्रालय, सर्वोच्च अदालत, सभापति शेरबहादुर देउवा लगायत विभिन्न पार्टीका नेताका घरहरूमा आगजनी भएको थियो।
सरकारी र निजी सम्पत्तिमा आगजनी तथा तोडफोड गर्दै गरेका भिडिओहरू सामाजिक सञ्जालमा छन्। यस कार्यमा विभिन्न दलका नेता, कार्यकर्ता संलग्न रहेका फोटा/भिडिओहरू पनि आएका छन्।
‘जेनजी आन्दोलनका क्रममा माओवादी, रास्वपा, राप्रपा लगायत विभिन्न दल र विभिन्न समूहमा आबद्ध रहेकाहरू संलग्न रहेको देखिएको कुरा बिस्तारै खुल्दै आएका छन्, कतै हाम्रो पार्टी (कांग्रेस) कार्यकर्ताहरू पनि संलग्न पो थिए कि, एक जना मात्रै संलग्न रहेको रहेछ भने पनि हामी तुरून्त कारबाही गरिहाल्छौं,’ कांग्रेस केन्द्रीय कार्यालय स्रोतले सेतोपाटीसँग भन्यो।
महामन्त्रीद्वयले प्रदेश र जिल्लाहरूमा पठाएको सर्कुलरमा आगजनी र तोडफोडमा संलग्नको विवरण तुरून्त केन्द्रीय कार्यालयमा पठाउन भनिएको छ।
‘चुनावका बेला आधिकारिक उम्मेदवारलाई असहयोग गर्नेलाई अनुशासन कारबाही गरिएको छ, यस्तो ध्वंशमा संलग्नलाई छाड्ने कुरा भएन, पार्टी कार्यकर्ताहरूलाई अनुशासनमा राख्नैपर्छ, त्यसैले आगजनी र तोडफोडमा संलग्न जोकोही कार्यकर्तामाथि तत्काल निलम्बनलगायत कारबाही हुन्छ,’ केन्द्रीय कार्यालय स्रोतले भन्यो, ‘सरकारले पनि छानबिन गरी आवश्यक कानुनी कारबाही गर्दै जाला, त्यसअघि नै पार्टीका तर्फबाट संलग्न व्यक्तिहरूमाथि निलम्बनलगायत कारबाही गर्छौं।’
साथै महामन्त्रीद्वय थापा र शर्माले प्रदेश सभाका कामकारबाहीलाई थप प्रभावकारी बनाउन भनेका छन्।
‘प्रतिनिधि सभा विघटन भए पनि प्रदेश सभा, स्थानीय तह जीवित छ, त्यहाँ पार्टीले प्रभावकारी काम गर्नका लागि भूमिका बढाउनुपर्नेछ,’ स्रोतले भन्यो, ‘प्रदेश र जिल्ला कार्यसमिति सभापतिलाई थप भूमिकासहित काममा सक्रिय बनाउँदैछौं।’
असोज ३ गते संविधान दिवस ‘हात हातमा संविधान बोकेर’ मनाउन कांग्रेसले निर्देशन दिइसकेको छ। ७७ जिल्ला सभापति र जनसम्पर्क समितिहरूलाई भर्चुअल बैठक गरी संविधान दिवस मनाउन सर्कुलर गरेको उपसभापति पूर्णबहादुर खड्काले जानकारी दिए।
कांग्रेसले संविधान दिवसलगत्तै जिल्ला कार्यसमिति बैठकहरू राख्न पनि भनेको छ।
पार्टीको जिल्लागत रूपमा विद्यमान अवस्था र पार्टी केन्द्रले लिनुपर्ने आगामी रणनीतिबारे बुँदागत रूपमा लेखेर केन्द्रीय कार्यालयमा पठाउन भनिएको छ।
साथै केन्द्रीय कार्यालय सानेपा र पार्टीका वडा तहसम्मका संरचनामा भएका क्षतिको लगत संकलन गर्ने काम पनि सुरू गर्न भनिएको पार्टीले जनाएको छ।
केन्द्रीय कार्यालयमा भदौ २४ गते आगजनी भएको थियो। उक्त आगजनीबाट करिब १० करोड रुपैयाँको क्षति भएको प्रारम्भिक विवरण आएको छ। पार्टी कार्यालय भवन मर्मत गर्नुअघि कांग्रेसले इन्जिनियरबाट भवनको अवस्थाबारे जानकारीसमेत लिइसकेको छ।
जेनजी आन्दोलनका क्रममा प्रदर्शनकारीहरूको आक्रमणबाट सभापति शेरबहादुर देउवा दम्पती घाइते छन्। यो परिस्थितिमा उपसभापति खड्का र दुवै महामन्त्रीले पार्टीका नियमित गतिविधिलाई अघि बढाइरहेका हुन्।
यो पनि: पार्टी नेतृत्वबारे कांग्रेसमा छलफल चलेका तीन विकल्प
-1758107792.jpg)
-1746009348.jpg)
